QR Mádeniet jáne sport ministri Aqtoty Raiymqulova Nur-Sultan qalasyndaǵy №57 mektepte ótken ekologiialyq saǵatqa qatysty, dep habarlaidy "Ult aqparat".
Respýblikanyń barlyq mektepterinde ótip jatqan aktsiiany qoldaýǵa atsalysqan A.Raiymqulova aldymen bilim ordasynyń jumysymen tanysyp, oqýshylar aldynda sóz sóiledi. «Ár sekýnd saiyn 887 plastikalyq bótelke tastalady. Al bir plastikalyq bótelkeni ydyratý úshin 700 jyl qajet. Sondyqtan plastikalyq paketterdiń ornyna eko-sómkelerdi paidalaný kerek», - dedi Mádeniet jáne sport ministri.
A.Raiymqulova oqýshylardy tabiǵatqa osy bastan janashyrlyqpen qaraýǵa shaqyrdy.
Budan keiin ol mekteptiń kitaphanasynda eko-sabaq ótkizdi. Balalarǵa tabiǵattyń adam ómirindegi mańyzy týraly áńgimelep, jer, sý, aýany saqtaý jaiynda keńesterin aitty. Ekologiiaǵa degen jaýapsyzdyqtyń saldary sóz bolǵan jiynda balalar da ministrge óz saýaldaryn qoiyp, ashyq pikir almasty. «Biz barynsha energiia men sý shyǵyndaryn azaitýǵa atsalysýymyz kerek. Óitkeni, qazirgi ýaqytta sýǵa degen suranys halyq sanyna qaraǵanda 2 ese jyldam ósýde», - dedi A.Raiymqulova.
Osydan keiin vedomstvo basshysy oqýshylarmen birge mektep aýlasyna aǵash otyrǵyzdy. Bul rette A.Raiymqulova balalarǵa tabiǵattyń eń mańyzdy elementi sanalatyn aǵash otyrǵyzýdyń paidasy jaily aityp berdi. «Bir aǵash 2 litr ottegin óndire alady. Al bul - bir adam úshin 3 kúnge jetetin aýa. Tabiǵatqa jany ashyǵan ǵalamshardyń ár turǵyny jylyna keminde 14 aǵash otyrǵyzýy tiis», - dedi Mádeniet jáne sport ministri.
