Aqtóbede turaqtandyrý qoryndaǵy kartoptyń sapasy synǵa ushyrap, oblys ákimi Ońdasyn Orazalin jýrnalistermen kezdesýde óz oiyn aitty, dep habarlaidy QazAqparat.
Aqtóbe oblysynda biyl turaqtandyrý qoryna 1268 tonna kartop salyndy. Ony satyp alýǵa 78 million teńge qarjy jumsaldy. Degenmen tutynýshylar kelisi 84 teńge turatyn kartoptyń sapasyn synady. Kóbi buzylǵan, shirigen.
«Bizde osyndai máseleniń týyndaǵanyna qaraǵanda jaǵdaidy jetkilikti deńgeide baqylai almadym dep oilaimyn. Men de jaýaptymyn. Osyǵan jaýapty qyzmetker ózine artylǵan jumysty tiianaqty atqara almady, halyqty sapaly kartoppen qamtamasyz etýde salǵyrttyq tanytty. Qazir tekserý júrip jatyr. Aitarym – saýdada dostyq joq. Ózim de bir kezderdi bizneste júrdim. Ózi basqa, sózi bóten, keide isi basqa. Ekini ekige kóbeitkende tórt bola bermeidi. Bul jaǵdai osyǵan uqsas. Ýáde basqa, al sóredegi ónim basqa bolyp shyqty. Kimniń kinási? Kelisimshartqa qol qoiǵan adamdar ma, jetkizýshiler me álde óndirýshi me? Osyny anyqtaimyz. Sebebi qazir bári bir-birine siltep, jaýapkershilikten qashyp otyr. Birinshisi men sapaly kartop tasymaldadym dese, ekinshisi ne ákeldi, sony satýǵa shyǵarǵanyn aitty. Meniń oiymsha árqaisysynda bir kiltipan bar. Tekserý nátijesinen soń kásipkerge qatysty isine adal nemese jumysyna salǵyrt degen sheshim shyǵarylady. Sondai-aq oblystyq aýyl sharýashylyǵy basqarmasy, «Aqtóbe» ÁKK» AQ-na qatysty sheshimimdi aitamyn», - dedi oblys ákimi Ońdasyn Orazalin.
