Táýelsizdiktiń 25 jyldyǵyna orai Aqtóbeniń 83 kóshesi men 9 eldi mekenine ulttyq ataý beriledi. Zarechnyi 1, 2, 3, 4 ataýlary óz kezeginde Syǵanaq, Saraishyq, Turan, Kúltegin bolyp ózgerýi múmkin. Al Ońtústik-Batys 1,2 aýdandaryna Abylai han, Han táńiri ataýy beriledi. Bul usynysty qalalyq ákimdik shaǵyn aýdan turǵyndaryna jetkizdi, dep habarlaidy "Ult aqparat" Baq.kz portalyna silteme jasap.
Qalalyq máslihat depýtattary men qalalyq ákimdik ókili ataýy bir-birinen ainymaityn, 1,2,3 degen sanmen erekshelenetin eldi mekenderdi aralady. Aldymen №61 orta mektepke Zarechnyi-3 aýylynyń turǵyndary jinaldy. Bul aýyl bolashaqta Turan atalýy múmkin. Al Zarechnyi-1 aýylyna Syǵanaq, Zarechnyi 2-ge Saraishyq, Zarechnyi 4-ke Kúltegin ataýy tańdaldy. Jergilikti turǵyndarmen kezdesýdi bastaǵan top Zarechnyi-3 eldi mekenine Aqjol, Altybaqan, Ónege, Arǵymaq, Ǵibadat, Bazarlyq, Otan sekildi birneshe ataýdy usyndy.
«Táýelsizdik jyldarynda qalada 22 turǵyn úi alańy qurylǵan eken. Taiaýda Aqtóbe qalasynyń bas jospary bekitildi. Soǵan orai Táýelsizdiktiń 25 jyldyǵy aiasynda ataýsyz kóshelerge ataý berýge ruqsat berildi. Jospar boiynsha ataý tańdaldy. Máselen, Ońtústik-Batys, Ońtústik-Batys 2 eldi mekenderine Abylai han, Han Táńiri ataýy berilýi yqtimal. Al bas josparǵa sáikes Batys-1, 2, 3, 4 aýdandaryn «Aqtóbe siti» dep ataimyz. Bul iskerler qalashyǵy bolmaq. Batys-2 aýdanyndaǵy ortalyq kóshege Táýelsizdik dańǵyly ataýy beriledi. Turǵyndar usynysty qoldap jatyr»,- deidi Aqtóbe qalasy ákiminiń orynbasary Madiiar Qabyl.
Mundaida dókeidiń ákesi men kópshilik bilmeitin adamnyń esimi berilmeidi. Sebebi, Táýelsizdiktiń 25 jyldyǵyna orai bir rettik ulttyq ataý berýge múmkindik jasalǵan.
«Qazaqqa asa qundy ataýlardy halyq nazaryna usynamyz. Sondyqtan ata-anasy este qalsyn, sol kósheniń beldi turǵyny degen oilar qabyldanbaidy»,- deidi Madiiar Qabyl.
Sonymen qatar, Selmash aýdanyn Dostyq, Selmash-2 aýdanyn Aq Otaý dep ataý usynyldy. Barlyǵy 83 kóshe men 9 eldi mekenniń aty jańarady. Qazir ákimdik ózderi tańdaǵan ataýdy halyqqa tanystyryp júr. Eger qoǵamdyq qabyldaýǵa qatysqan turǵyndar kelisim berse, qalalyq máslihatta bekitiledi. Keiin respýblikalyq onomastikalyq komissiiasy qarap, sońǵy núkteni oblystyq máslihat qoiady.
Aita keteiik, jergilikti ákimdik ókilderi kóshe men eldi meken ataýy ózgergen kezde úidiń tehnikalyq tólqujaty tegin ózgertiletinin jetkizdi.
.jpeg)