Aqtóbelikter baspanasy sý astynda qalǵan adamdarǵa zattai, qarjylai kómektesip jatyr. Qaiyrymdylyq aktsiiasyn «Nur Ǵasyr» meshitiniń janyndaǵy qor uiymdastyrdy, dep habarlaidy QazAqparat tilshisi.
Aqtóbe qalasyndaǵy eriktiler birneshe top quryp, qaiyrymdylyq aktsiiasyn uiymdastyryp jatyr. «Nur Ǵasyr» meshiti janyndaǵy «Zeket» qory keshe áleýmettik jeli arqyly habarlandyrý berip, kópshilikke úndeý tastady.
«Sý basqan úilerdi qarap, adamdarmen sóilesip keldik. Keiin olarǵa kómektesý qajet degen sheshim qabyldandy. Biz taza, bútin kiim-keshek pen turmystyq zatardy, azyq-túlikti qabyldaimyz. Qaiyrymdy adamdar qarjy jinap berip jatyr»,- dedi «Zeket» qorynyń ókili Ómirbek Dámen. Qor músheleri búgin úzilissiz jumys isteidi. Keshkilik bar jinalǵan múlikti arnaiy shtabqa tapsyrady. «Biz týraly estip, baspanasy sýǵa ketip jatqan adamdar meshit janyndaǵy qorǵa kelip jatyr. Olarǵa kómek kórsetiledi. Sonymen qatar, elimizdiń ár óńirinen habarlasyp, aqsha aýdarý úshin esepshot nómirin suraityndar bar», - dedi Ó. Dámen.
Buǵan deiin habarlaǵanymyzdai, baspanasy sýǵa ketken aqtóbelikter qazir mektepterdi panalap otyr. Onda 600-ge jýyq adam bar. Keibiri tek qujattaryn alyp úlgerse, ózgesi úi kiimimen janyn saqtap shyqqan.
