Aqtóbede 11 shaǵynaýdan turǵyndary ákimdiktiń sheshimimen kelispedi. Stadion ornyna turǵyn úi salmaq bolǵan kásipkerge qarsylyq bildirgen olar óz oilaryn ashyq bildirdi, dep habarlaidy "Ult aqparat".
Aqtóbe qalasy 11 shaǵyn aýdan turǵyndary «kópqabatty úi aýlasyndaǵy shaǵyn stadionǵa taǵy úi salamyz» degen eskertýdi estigen kezde qarsylyq bildirdi. Olar bul habardy qurylys kompaniiasynan bilip, abdyrap qalmai, jinalyp, óz oilaryn ashyq aitty.
«Qala ákimdigi zeinetkerlerge arnap saýyqtyrý ortalyqtaryn ashty. Biraq barar jer alys. Sondyqtan biz úi mańyndaǵy stadionǵa kelemiz. Osynda júremiz, serýendeimiz. Kútimi nashar bolsa da bul alań bizdiń tynyǵatyn ornymyz. Munda adam kóp, al demalys orny joq. Ózimiz, balalarymyz, nemerelerimiz úshin alańdy saqtap qalǵymyz keledi»,- dedi qala turǵyny Qarashash Óksikbaeva.
Aita keteiik, bul shaǵyn aýdanda orta mektep te bar. Oqýshylar da dene shynyqtyrý páninde shyǵyp, júgiredi.
«Sportshylar, balalar, eresekter de osy jerde sportpen shuǵyldanady. Muny bári kórip júr. Sport alańyna turǵyn úi salý durys emes», - qala turǵyny Gúlnar Temirjanova.
Turǵyndardyń narazylyǵyn estilegen Aqtóbe qalalyq ákimdigi sheshimdi qaita qarap shyqty.
«Bul jer qala menshiginde boldy. Keiin «Nektar» óndiristik kooperativiniń jeke menshigine berildi. Sol kezde qalalyq sáýlet, qala qurylysy bóliminiń basshysy kelip, bul týraly turǵyndarǵa túsindirgen. Turǵyndar óz qarsylyǵyn bildirgen soń qala ákimdigi «Nektar» óndiristik kooperativi basshysymen qaita kelissóz júrgizdi. Kelisim jasaldy. Úi salynbaidy. Jer ýchaskesi qalaǵa qaitarylady. Bir aptada sheshimi shyǵady», - Aqtóbe qalalyq jer qatynastary bóliminiń bas mamany Jánibek Qabylov.
