Aqtóbede 75 jastaǵy qariia alaiaqtardyń qurbany boldy. Ol ekinshi deńgeili bank esepshotyndaǵy 13 mln teńge aqshasynan aiyryldy, dep habarlaidy "Ult aqparat".
Aqtóbe oblystyq PD baspasóz qyzmetiniń habarlaýynsha, óńirde kún saiyn alaiaqtyq deregi tirkeledi. Túrli eskertýge qaramastan, turǵyndar qupiia ustaýy tiis aqparatty beitanys adamǵa berip, barynan aiyrylyp qalyp jatyr.
«Zeinetkerge belgisiz adam qońyraý shalyp, ózin ekinshi deńgeili bankterdiń biriniń qaýipsizdik qyzmetkeri retinde tanystyrǵan. Qońyraý shalýshy alaiaqtar onyń atynan nesie rásimdep jatqanyn jáne muny toqtatý úshin jinaq aqshasyn qaýipsiz shotqa aýdarý kerektigin aitqan. Jábirlenýshi qońyraý shalýshynyń barlyq aitqanyn oryndaǵan. Nátijesinde alaiaqtar onyń shotynan 13 mln teńge somasynda aqsha alǵan. Alaiaqtyq deregi boiynsha kúdikti adamdy anyqtaýǵa jáne ustaýǵa baǵyttalǵan tergeý áreketteri júrgizilip jatyr», - dedi oblystyq PD baspasóz qyzmetiniń jetekshisi Erbolat Sarqulov.
Eske salsaq, Aqtóbe oblystyq PD-de Kiberpol qyzmeti jumys istep tur. Munda byltyr myńnan astam is tirkeldi. Aqsha aýdarý onlain júretin bolǵan soń bul baǵyttaǵy istiń kóbi ashylmaǵan.
