«Halyq qaýipsizdigin qamtamasyz etý» jobasy aiasynda qala men 5 aýdandaǵy 80 nysannyń lańkestik oqiǵaǵa daiyndyǵy tekserildi. Internette terroristik mazmundaǵy 290 material anyqtalyp, basym bóligi joiyldy, dep habarlaidy QazAqparat tilshisi.
«Halyq qaýipsizdigin qamtamasyz etý» jobasyn Bas prokýratýra bastap, jergilikti ákimdik qoldap, qazirgi ýaqytta Aqtóbede jumys áli jalǵasyp jatyr. Aqtóbe qalasy men Alǵa, Baiǵanin, Temir, Muǵaljar, Shalqar aýdandaryna biyl áleýmettik qyzmetkerler men dárigerler, teologtar men imamdar, biznes keńesshiler taǵy bardy. Kezdesý mektepte, meshitte, aýrýhanada, kásiporyndarda uiymdastyrylǵan. Jat aǵym jeteginde júrgenderdiń kóshin bastap turǵan Temir, Muǵaljar, Shalqar aýdandarynda teologtar toptyq emes, jeke áńgimelesý júrgizgen. Ázirge 40 adam óz kózqarasyn ózgertýge beiim ekenin kórsetti. Týra jolǵa túsirý jumystary ári qarai jalǵasady. Prokýrorlar bastaǵan jumys toby terroristik turǵyda osal nysandardy nazardan tys qaldyrmaǵan. Ári internetten terroristik mazmundaǵy 290 material tabylyp, onyń 163-i joiyldy.
«Tekserý kezinde 80-ge jýyq terroristik turǵydan osal nysan zertteldi. Olar: mektepter men balabaqshalar, bazarlar men qarý saqtalatyn oryndar, adam kóp shoǵyrlanatyn nysandar. Beinekameralar men kúzetshilerdiń jumysynda kemshilikter bar. Nysan iesine usynystar berildi. Jaýapkershilikke tartqan joqpyz. Zań boiynsha 100-den 500 ailyq eseptik kórsetkishke deiin aiyppul qarastyrylǵan. Bizdiń maqsatymyz - jaýapqa tartý emes, kemshilikterdi joiý. Al terroristik mazmundaǵy jazbalarǵa keler bolsaq, Aqparat jáne kommýnikatsiialar ministrligindegi tehnikalyq qyzmet biz bergen silteme boiynsha materialdardy joiady. Tehnikalyq múmkindikteri bolsa birden joiyp jiberedi. Múmkindikteri bolmasa, sol saittyń ákimshisimen, ielerimen bailanysady. Taǵy bir aida báriniń kózin joiamyz degen senim bar», - dedi Aqtóbe oblysy prokýrorynyń birinshi orynbasary Nurdáýlet Súiindikov.
«Biznesti damytý» baǵyty boiynsha qarjy institýttary arqyly 414 million teńge berildi. Taǵy 235 million teńgeniń biznes jobasy maquldandy.
«Er-Nur» sharýa qojalyǵyna kartop tuqymyn izdep, ony jetkizý joldaryn sheship berdik. Al múmkindigi shekteýli jan Shildebaevqa tigin mashinasy syiǵa berildi. Ol kiim tigip, kásibin bastaǵysy keledi. «Biznes bastaý» kýrsyna 285 adam jazyldy. Al 75 adam «Biznes keńesshi» kýrsynan ótip, arnaiy sertifikat aldy. Bul olarǵa memlekettik baǵdarlamalarǵa qatysyp, kásippen ainalysýyna múmkindik beredi», - dedi Aqtóbe oblysy prokýrorynyń birinshi orynbasary Nurdáýlet Súiindikov.
Al «Áleýmettik qoldaý» baǵyty boiynsha 44 adam jumysqa ornalasty. Sonymen qatar 24 balaǵa járdemaqy taǵaiyndaldy. Aýyl adamdarynyń densaýlyǵy tekserilip, 300-ge jýyq balanyń tisi emdeldi. Barlyǵy 500-den astam adam emdelip, onyń 141-i aýrýhaǵa jatty. 100 oqýshy saýyqtyrý oryndaryna joldama alyp, 25 adamǵa ota jasaldy. Joba aiasynda aýyl balalary úshin tegin bilim alýǵa múmkindik týdy. Jumys toby 37 balany iriktep alyp, olardyń kolledj ben litseilerde tegin oqýyna múmkindik jasamaq. Bir aiǵa sozylǵan jumys kezinde 7 topta 130-dan astam sarapshy eńbek etti. Olar 57 aýyl men 5 qalaǵa baryp, barlyǵy 100 myń adamdy qamtyǵan kezdesý ótkizdi.
