Aýdan, aýyl ákimderiniń esebine qatysý úshin el aralaýǵa shyqqan Aqtóbe oblysynyń ákimi Berdibek Saparbaev dini jaǵdaiy kúrdeli Muǵaljar aýdany ákiminiń esebine qatysty, - dep habarlaidy NUR.KZ portalynyń óńirdegi tilshisi.
Erbol Danaǵulov aýylda jasalyp jatqan jumystardy, elbasy baǵdarlamasy men oblys ákiminiń naqty tapsyrmalaryn qalai oryndap jatqanyn aityp berdi. Óńirdegi dini ahýaldyń alańdatarlyq jaǵdaida ekenin de jasyrǵan joq.
«Qazirgi tańda aýdanda 10 meshit bar. Oǵan 800 adam keledi. Onyń ishinde 447-si basqa dinde adasyp júrgender. Osy jaǵy qiyndap tur. Osyǵan bailanysty Túrkistan qalasynan bir mamandy shaqyryp jatyrmyz. Qazir osyndai kisilermen jumys istep, aýdanǵa saýatty mamandar tartqymyz keledi. Aralarynda birneshe ret úilengender men birneshe ret turmys quraǵandar bar. Bizge saýatty teologtar kerek. Olardy keiin qaitarý ońai emes. Qiyndyq týǵyzatyndar bar. Biraq, túbinde baǵyttarynan qaitaratyn bolamyz», - deidi Muǵaljar aýdanynyń ákimi Erbol Danaǵulov.
Aýdan ákimi mektepte namaz oqyp, búrkenip júretin oqýshylar sanynyń azaimai jatqanyn da aitty.
«Mektepke oramal taǵyp baryp, mektepte namaz oqityn balalarymyz joq emes, bar. Osyǵan bailanysty birneshe otyrystar ótkizildi. Balalardyń ata-analarymen sóilesken kezde nátije bergenderi bar», - deidi Erbol Danaǵulov.
Adasqan aǵym jeteginde júrgender ákim usynǵan 50 myń teńgeniń jumysynan bas tartyp, jalaqysy kóp jerge turǵyzýdy surap otyr.
«Basqa aǵymda adasyp júrgen ár adammen jergilikti ákimder, depýtattar bólip alyp, jumys istep jatyrmyz. Meniń ózim Qandyaǵash qalasynda úsh otbasyn óz qadaǵalaýyma aldym. Olardyń barlyǵyna jumys usynyp jatyrmyz. Úiine kiris kózi kirmese, kámelettik jasqa tolǵan balalaryna deiin jumysqa tartamyz. Biraq, olar biz usynǵan jumysqa baryp jatqan joq. Balalaryn balabaqshaǵa ornalastyrdyq. Olar ailyǵy kóp jerlerden jumys suraidy. 40-50 myń teńgeniń jumysyn istegileri kelmeidi. Bári az aqshaǵa barmaimyz dep qolhat jazyp berdi. Turmystyq jaǵdailary salystyrmaly túrde jaman emes. Kópshiligi taksi qyzmetinde jáne telefon jóndeidi. Eseptep kórdik, shamamen árqaisysynyń úiine aiyna 100 myń teńgedei kiris kiretin adamdar. Biz usynǵan jumysty jumys dep otyrǵan joq», - dedi aýdan ákimi.
