Oqýshy óliminen soń Qylmystyq kodekstiń «Buzaqylyq», «Adam óltirý» baptary boiynsha is qozǵaldy. Kúdikke ilikkenderdiń bári - oqýshylar men kolledj stýdentteri, dep habarlaidy "Ult aqparat".
Búgin Aqtóbe oblystyq politsiia departamentiniń bastyǵy Atyǵai Arystanov oqýshy ólimine qatysty jan-jaqty aqparat berdi. Tóbeles oqýshy qyz ben jigit arasyndaǵy qarym-qatynastan soń bolǵan.
«10 qarasha kúni balalar top bolyp tóbeleskenin bilesizder. №61 orta mekteptiń 2004 jylǵy oqýshysy kóz jumdy. Oqiǵa shamamen saǵat 20:00-de Zarechnyi aýylyndaǵy «Jalǵas» dúkeni mańynda boldy. Kámelet jasyna tolmaǵandardyń tóbelesi qyz ben jigit arasyndaǵy qarym-qatynastan bastalǵan eken. Sol mekteptiń 9-synyp oqýshysy qurdasymen sózge kelip, janjaldasyp qalǵan. Al oqýshy qyz tanystaryna shaǵymdanyp, keiin onyń sońy úlken daýǵa ainalyp ketti. Qazirgi kezde kúdiktilerdiń bári ustaldy. Qylmystyq kodekstiń «Buzaqylyq», «Adam óltirý» baptary boiynsha is qozǵalyp, sotaldy tergeý jumystary júrip jatyr», - dedi Aqtóbe oblystyq politsiia departamentiniń bastyǵy Atyǵai Arystanov.
Bul tóbeleske №61 orta mekteptiń 9, 10, 11 synyp oqýshylary, M.Aryn atyndaǵy mekteptiń shákirtteri qatysqan. Kolledj stýdentteri de bar. Sol kúni 15 jastaǵy jábirlenýshini jappai tóbeleske qatysqan jasóspirimder aýrýhanaǵa jetkizgen. Biraq aýrýhana ishine kirgizbei, aýlasyna tastap ketken.
«Qaiǵyly oqiǵadan soń da bir jasóspirim aýlada turǵan ákesiniń kóligin aidap ketip, jábirlenýshini aýrýhanaǵa aparmaq bolǵan. Temirjol aýrýhanasyna aparyp, sol mańǵa tastap ketken. Ózderin politsiia qyzmetkerleri ustap aldy. Rólde kámelet jasyna tolmaǵan №61 mekteptiń 11-synyp oqýshysy otyrǵan. Ákesi bilmegen, otbasyna aitpaǵan», - dedi Atyǵai Arystanov.
Politsiia bastyǵy ata-analardan balalaryn baqylaýsyz qaldyrmaýdy surady. Ásirese keshkisin úiden shyǵarmaǵan abzal.
«Oqýshy ólimine qatysty Aqtóbe avtojol kolledjiniń 17 jastaǵy stýdenti qamaýǵa alyndy. Onyń janynda dostary da bolǵan. Bireýi - kolledj stýdenti, ekinshisi - M.Aryn atyndaǵy orta mekteptiń 11-synyp oqýshysy», - dedi politsiia bastyǵy.
Eske salsaq, Aqtóbede kámelet jasyna tolmaǵan balalar arasynda tóbeles bolyp, bireýi kóz jumdy, taǵy ekeýi pyshaq jaraqatyn aldy.
