Aqtóbe oblystyq qylmystyq ister jónindegi mamandandyrylǵan aýdanaralyq sotynda avtobýs órtine qatysty sot otyrysy bastaldy, dep habarlaidy QazAqparat tilshisi.
Aqtóbede avtobýs órtenip, 52 Ózbekstan azamaty qaza tapqan bolatyn. Buǵan deiin habarlaǵanymyzdai, sot aldy otyrysy aýdanda ótip, negizgi talqylaý oblys ortalyǵyna aýystyryldy.
Búgin basty sot otyrysyna qaza bolǵan ózbekstandyqtardyń ata-analary keldi. Olar qazaq tilin túsinbeitinin aityp, elshilikten aýdarmashy jiberýdi suraǵan.
«Balam Adhamjan Marýfjonov pen nemerem Avazbek Marýfjonov úshin sotqa keldim. Biz balalarymyzdyń bári tiri dep esepteimiz. Sebebi, meniń nemeremniń telefon nómiri óshken joq, áli bailanys aiasynda tur. Biz qazaq tilin bilmeimiz, sondyqtan aýdarmashy suraimyz. Qorǵaýshy da jaldamadyq, bizdiń qorǵaýshymyz - Alla. Barlyǵy 11 adam keldi. Bári balasyn joǵaltqan»,- dedi jábirlenýshi Iýldýzdjon Ǵanieva.
Aita keteiik, jábirlenýshiler men aiyptalýshylar BAQ ókilderiniń sotqa qatysýyna esh qarsylyq kórsetpedi. Qazir sot otyrysy jalǵasyp jatyr.
