Aqtóbe oblysynda avtobýsta 52 adamnyń órtenip ketýine kináli tulǵalarǵa qatysty sot úkimi shyqty, dep habarlady Sputnik Qazaqstan tilshisi.
Shymkenttegi "Aziia tranzit" JShS-niń quryltaishysy Nurlybek Telikbaev 3 jyl 6 aiǵa, avtopark mehanigi Bahadúr Perdebaev 3 jyl 6 aiǵa bas bostandyǵynan aiyrylyp, sot zalynda qamaýǵa alyndy.
Órtengen avtobýsty júrgizgen Nurjan Qyrǵyzbaev, Maqsat Pernebekov, Barat Tańatovtardy 5 jylǵa bas bostandyǵynan aiyrýǵa úkim shyqty. Júrgizýshiler 7 jyl boiy kólik júrgize almaidy.
Sonymen qatar sottalýshylarǵa jábirlenýshilerdiń árqaisysynyń otbasyna 2 million teńgeden moraldyq shyǵyn óteý mindetteldi.
Esterińizge salaiyq, 18 qańtarda Aqtóbe oblysynyń Yrǵyz aýdanynda Samara — Shymkent tasjolynda avtobýs órtenip, 52 adam qaza boldy, barlyǵy Ózbekstan azamaty.
Júrgizýshiler Barat Tańatarov, Nurjan Qyrǵyzbaev jáne Maqsat Pernebekov órt qaýipsizdigi talaptaryn buzý, kólik quraldaryn paidalaný erejelerin saqtamaý saldarynan eki nemese odan da kóp adamnyń qaza tabýy boiynsha aiyptaldy.
Qylmystyq is 52 tomnan turady, 100-den astam adam jábirlenýshi retinde tirkeldi.
