Aqtóbe oblysy Qobda aýdany Sarybulaq aýyly turǵynynyń 113 bas qoiyn aidap áketti dep kúdikke ilingen eki adam qamaýǵa alyndy. Ekeýi de - Qobda aýdanynyń turǵyny. Bul aqparatty Aqtóbe oblystyq politsiia departamentiniń baspasóz qyzmeti habarlady, dep jazady Azattyq.
Politsiianyń boljamynsha, Sarybulaq aýylynan urlanǵan maldy kúdiktiler aýdan ortalyǵy Qobdaǵa aidap alyp barǵan. "Bes qasapshyny jaldap, 23 bas qoidy soiyp bola bergen kezde kúdiktiler qolǵa tústi" dep habarlady politsiia.
Bul oqiǵaǵa bailanysty Qylmystyq kodekstiń 188-baby ("Urlyq") boiynsha qylmystyq is qozǵalǵan. Bul bap boiynsha eń joǵary jaza - bes jylǵa deiin bas bostandyǵynan aiyrý. 11 jeltoqsanda sot kúdiktilerdi eki aiǵa qamaýǵa sanktsiia bergen.
Politsiia dereginshe, biyl Aqtóbe oblysynda mal urlyǵymen bailanysty 229 oqiǵa tirkelgen. Myńnan astam mal urlanǵan. Mal urlyǵy ásirese, Alǵa men Qobda aýdandarynda jii kezdesedi. Politsiia qylmystyń kóptigin mal ieleriniń tórt túlikti óriske qaraýsyz jiberetindigimen bailanystyrady.
"Oblysta óristegi malǵa arnaiy chip ornatatyn sharýashylyqtar óte az" deidi Aqtóbe oblystyq politsiia departamentiniń baspasóz qyzmeti.
Aqtóbe oblysynda mal urlyǵymen bailanysty qylmystardyń 30-40 paiyzy ǵana ashylady. Biyl jyl basynda sharýalar Aqtóbe oblysynyń "Atameken" kásipkerler palatasynyń kásipkerler quqyǵyn qorǵaý jónindegi keńesine baryp, oblysta mal urlyǵynyń kóbeiip ketkenine shaǵymdanǵan bolatyn.
Sol jiynda Aqtóbe oblysy prokýrorynyń birinshi orynbasary Azamat Dúisembekov mal urlyǵyna qatysty isterdi tergeý barysynda politsiianyń kemshilik jibergenin rastap, urlyq derekteriniń baqylaýǵa alynǵanyn aitqan.
