Aqtóbede jol-kólik apaty saldarynan zardap shekken 10 jasar bala aýrýhanada kóz jumdy, dep habarlaidy "Ult aqparat".
Oqiǵa Samara-Shymkent tasjolynyń Áiteke bi aýdany Belqopa aýyly mańynda boldy. «Toyota Samry» kóliginiń júrgizýshisi rýlge ie bola almai, aýdarylyp qaldy.
«Jol apatynan eki jolaýshy men júrgizýshi zardap shekti. Qyzylorda oblysynyń 37 jastaǵy turǵyny jáne 10 jastaǵy bala aýrýhanaǵa jetkizildi. Ókinishke qarai bala Áiteke bi aýdandyq aýrýhanasynda kóz jumdy. Qazirgi kezde Qylmystyq kodekstiń 128-baby boiynsha is qozǵaldy», - dedi oblystyq PD baspasóz qyzmetiniń jetekshisi Erbolat Sarqulov.
Eske salsaq, buǵan deiin qaladaǵy baý-baqsha ujymdarynyń birinde jazataiym oqiǵa tirkelgen bolatyn. 48 jastaǵy aqtóbelik óz úiiniń aýlasynda turǵan «Opel Astra» avtokóligin aidap, 2020 jyly týǵan balany qaǵyp ketti. Jol-kólik oqiǵasy saldarynan bala bas-mi jaraqatyn aldy. Ol shuǵyl túrde oblystyq balalar klinikalyq aýrýhanasyna jatqyzyldy.
