- Aqtóbe oblystyq eńbek inspektsiiasy óz jumysshylaryna jalaqy tólei almai otyrǵan «Jańatas» kompaniiasynyń qiyrshyq tas zaýytyn tekserý ústinde. Al jalaqylaryn ala almai júrgen óndiris ornynyń qyzmetkerleri búgin jinalyp, jergilikti bilikten kómek surady, dep habarlaidy Ult.kz tilshisi QazAqparat agenttigine silteme jasap.
«Eńbek inspektsiiasy ótken jyly «Jańatas» qiyrshyq tas zaýytyn úsh ret tekserdi. Jospardan tys tekserýden soń 1 million teńge ákimshilik aiyppul salyndy. Zaýyt basshylarynyń málimetinshe, jalaqy qaryzy tek jeltoqsan aiynda tirkelgen. Ol tapsyrys berýshiler der kezinde esep aiyryspaýynan oryn alǵan. Barlyǵy 50-den astam jumysshy jalaqy almaǵan. Onyń jalpy somasy kezekten tys tekserýden soń belgili bolady»,- deidi oblystyq eńbek inspektsiiasy jónindegi basqarma basshysynyń orynbasary Baýyrjan Orazaev.
Eske salsaq, Aqtóbe oblysy, Shalqar aýdanyna qarasty Birshoǵyr aýyly mańynda qiyrshyq tas óndiretin «Jańatas» kompaniiasy óz jumysshylaryna jalaqy tólei almai otyr. «Erteń bolady» degen jaýapty estýden sharshaǵan jumysshylar búgin keńse aldyna jinalyp, ákimdikten kómek surady.
«Jalaqy ala almaǵan soń, qazan aiynan bastap prokýratýraǵa, eńbek inspektsiiasyna shaǵym túsirdik. Eshkimnen jaýap kelmedi. Qazir aýyldan, qalaǵa keldik. Bir aptadan beri keńsege kelip júrmiz, jaýap joq. Bala-shaǵamyz kúnde jylaidy, nesiemiz de tólenbei jatyr. Tipti, qaiyr surap ketýdiń az-aq aldynda júrmiz»,- dedi jumysshy Maqsat Tájibaev.
Anyqtalǵandai, qyzmetkerlerdiń bir bóliginde zańdy túrde resimdelgen eńbek kelisimsharty bolsa, biri jumysqa aýyzsha kelisip kirgen.
«Qaladaǵa keńsege kelip, jalaqymyzdy alamyz dep úmittendik. Biraq eshkim naqty jaýap bere almaidy. Aýyldan keldik, qazir qaltamyzda bir tiyn aqsha qalmady. Aýylǵa qalai qaitarymyzdy bilmeimiz. Bárimizdiń basymyzda birneshe nesie bar, balalarymyzǵa tamaq taýyp berý muń bolyp ketti»,- deidi zaýyttyń taǵy bir eńbekkeri Edige Naýryzbaev.
