Aqtóbede úsh emdeý mekemesi qabyldamai qoiǵan 5 jasar qyzdyń ólimine bailanysty arnaiy komissiia quryldy, dep habarlaidy "Ult aqparat".
Aqtóbe oblystyq Densaýlyq saqtaý basqarmasy táýelsiz komissiia quryp, balanyń ólim sebebin anyqtaýǵa kiristi.
«Bul jaǵdai Densaýlyq saqtaý ministrliginiń, oblys ákiminiń baqylaýyna alyndy. Komissiia quramynda ózge oblystyń dárigerleri men bilikti mamandary bar. Táýelsiz baqylaý júrgiziledi. Balanyń úsh emdeý mekemesiniń qabyldaý bólimderinde júrip qalǵanyn rastaimyz. Bul – durys emes jáne aldaǵy ýaqytta qatań shara qoldanylady. Balanyń naqty qai jeri aýyrǵanyn endi táýelsiz komissiia anyqtap, habarlaidy. Aldyn ala boljam boiynsha, virýsty infektsiia midy jáne tynys alý joldaryn jansyzdandyrǵan», - dedi oblystyq Densaýlyq saqtaý basqarmasy basshysynyń orynbasary Svetlana Esenamanova.
Onyń aitýynsha, bala 6 kún boiy aýyryp, jetinshi kúni jedel járdem shaqyrǵan.
«Balabaqshada júrgende qyzýy kóterilip, arada apta ótkende ǵana dárigerlerge júgingen. Bul – meningit emes, jedel respiratorlyq-virýstyq infektsiia», - dedi S.Esenamanova.
Aita keteiik, naýqas qyz aldymen, jedel járdemmen oblystyq balalar aýrýhanasyna jetkizilgen. Ol jerden juqpaly aýrýlar aýrýhanasyna, odan ári qalalyq balalar aýrýhanasyna joldanǵan.
«Emhanadan jedel járdemmen oblystyq balalar aýrýhanasyna jetkizildi. Pediatr, neirohirýrg qarap, juqpaly aýrýlar aýrýhanasyna jibergen. Ol emdeý orny naýqasty qabyldamai, qosymsha keńes alý úshin qalalyq balalar aýrýhanasyna siltedi. Bul – durys emes. Juqpaly aýrýlar aýrýhanasy qajetti mamandy emdeý ornyna shaqyrýy tiis edi. Sodan soń bala qalalyq balalar aýrýhanasyna baryp, juqpaly aýrýlar aýrýhanasyna qaita kelip, aýrýhanada kóz jumdy. Anyqtalǵany osy», - dedi basqarma basshysynyń orynbasary.
