Aqtóbe politsiiasy toi ótkizip, eske alý sharasyn uiymdastyrǵandardy anyqtady, dep habarlaidy "Ult aqparat".
Aqtóbe oblysynyń PD qyzmetkerleri 5 shildeden bastap karantin talabynyń oryndalýyn baqylaý maqsatynda reidke shyqty. Tekserý nátijesinde politseiler ÁQBtK-niń 425-baby boiynsha 316 zań buzýshylyqty anyqtady. Saltanatty jáne eske alý sharasyn ótkizgen 24 fakti tirkeldi. Onyń ishinde demalys aimaǵynda úilený toiyn ótkizgender jazalandy.
«Dúken, dámhana, monsha, shashtaraz ben sulýlyq salondaryna qatysty 300-ge jýyq quqyqbuzýshylyq anyqtaldy. Kásipkerlik sýbektileri karantin rejimin saqtamady, sanitariia talabyn eskermedi. Mysaly, 2 tamyzda ýchaskelik politsiia inspektory Aqtóbe qalasyndaǵy dámhanalardyń biri saǵat 22:00-den keiin jumys istegenin tirkedi. Is boiynsha ákimshilik hattama toltyrylyp, oblystyq taýarlar men qyzmetterdiń qaýipsizdigi men sapasyn baqylaý departamentine shara qabyldaý úshin jiberildi.
Politsiia departamenti aqtóbelikterdi karantin rejimin saqtaýǵa, buqaralyq is-sharalardy ótkizbeýge jáne olarǵa qatyspaýǵa, sondai-aq qoǵamdyq, adam kóp jinalatyn oryndarǵa barǵan kezde qajetti qorǵaný quraldarynyń barlyǵyn qoldanýǵa shaqyrady», - dep habarlady oblystyq PD baspasóz qyzmetiniń jetekshisi Erbolat Sarqulov.
