Aqtóbede aqyn Tólegen Aibergenov pen kompozitor Shámshi Qaldaiaqovqa arnalǵan eskertkish jáne eskertkish biýst ornatyldy, dep habarlaidy QazAqparat.
Aqtóbede «Ádebiet. Rýh. Qoǵam» atty eki kúndik respýblikalyq ádebi forým ótti. Oǵan Jazýshylar odaǵynyń tóraǵasy Ulyqbek Esdáýlet, aqyn Elena Ábdihalyqova, aqyn Baýyrjan Jaqyp, QR Jazýshylar odaǵynyń múshesi Mereke Qulkenov, kompozitor Qurmanáli Qaldybek, Mádeniet jáne sport ministrliginiń ókilderi qatysty.
«Men sizderdi Qazaqstan Respýblikasy Táýelsizdiginiń 30 jyldyǵyn merekeleý qarsańynda, «Rýhani jańǵyrý« baǵdarlamasy aiasynda uiymdastyrylǵan dástúrli «Ádebiet. Rýh. Qoǵam« forýmynda kórgenime qýanyshtymyn. «Alash« qozǵalysynyń kóshbasshysy Ahmet Baitursynovtyń «óz tilinde sóileitin jáne óz ádebieti bar halyq qana derbes ómirge úmitker bola alatynyn eshqashan umytpaýymyz kerek« degen sózin este ustasaq, forýmnyń basty maqsaty qazaq ádebietinde eleýli iz qaldyrǵan Aqtóbe óńiriniń kórnekti tulǵalarynyń esimderin tanymal etý. Sondai-aq jańa talanttardy anyqtaý bolyp tabylady», - dedi oblys ákimi Ońdasyn Orazalin. Sońǵy jyldary Aqtóbede Altyn Orda dáýiriniń qolbasshysy jáne memleket qairatkeri Er Edigeniń, uly oishyl Abai Qunanbaevtyń eskertkishteri ashyldy.
Kieli nysandar, onyń ishinde Abat Baitaq, Han molasy, Dosjan haziret keseneleri jóndeldi. Eki jyl buryn Temir aýdanyndaǵy Tasqopa qorymynan tabylǵan Altyn adamnyń kiimderi qalpyna keltirildi. Belgili ǵalymdar men qoǵam qairatkerleriniń qatysýymen ǵylymi-praktikalyq konferentsiialar ótkizildi. Aqtóbe oblysynan shyqqan ataqty aqyndar men jazýshylardyń úzdik shyǵarmalarynyń jinaǵy shyǵaryldy. Al eki kúndik forým aiasynda «Edige degen er eken» atty respýblikalyq jyrshylar baiqaýy, Tabyldy Dosymov atyndaǵy bard ánderin oryndaýshylardyń respýblikalyq konkýrsy jáne basqa da is-sharalar ótti. Sonymen qatar respýblikalyq ádebi baiqaýdyń 10 nominatsiia boiynsha jeńimpazdary marapattaldy. Olarǵa Tólegen Aibergenov, Saǵi Jienbaev, Ótejan Nurǵaliev, Tobyq Jarmaǵambetov, Qajyǵali Muhambetqaliuly, Tahaýi Ahtanov, Bákir Tájibaev, Úmbetbai Ýaidin, Qýandyq Shańǵytbaev, Iztai Mámbetov siiaqty shyǵarmalary qazaq ádebietiniń klassikasyna engen kórnekti aqtóbelik aqyndar men jazýshylar atyndaǵy stipendiialar tabys etildi.
Sonymen birge kompozitor Shámshi Qaldaiaqov pen aqyn Tólegen Aibergenovke arnalǵan eskertkishterdiń ashylý saltanaty ótti. Oǵan Shámshi Qaldaiaqovtyń ápkesi Raihan Dombaeva jáne aqyn Tólegen Aibergenovtiń qyzy Mahabbat Aibergenova qatysty. Eskertkishter qala ortalyǵynda – aǵaiyndy Jubanovtar kóshesi boiyndaǵy Ǵashyqtar alleiasynda ornalasqan. Tólegen Aibergenov eskertkish biýstiniń biiktigi - 3,2 metr. Shámshi Qaldaiaqovtyń eskertkishi kompozitordyń qolyna mýzykalyq aspapty alǵan kúii oryndyqqa otyrǵany beinelegen.
