Aqtóbe oblysy Muǵaljar aýdanynyń ortalyǵy Qandyaǵash qalasynda pyshaq jaraqatyn alǵan mektep oqýshysynyń jaǵdaiy jaqsaryp keledi. Bul týraly Muǵaljar aýdandyq aýrýhanasy bas dárigeriniń orynbasary Baltabek Qusaiynov aitty, dep habaralidy Azattyq.
Dárigerdiń sózinshe, eki sanynan jaralanǵan mektep oqýshysy aýdandyq aýrýhanaǵa 18 qarashaǵa qaraǵan túni túsken.
- Jabyq bas-mi jaraqatyn alǵan, miy shaiqalyp, úshkir zattan eki sany jaraqattanǵan oqýshynyń qazirgi jaǵdaiy turaqty. Jaraqatyn tańyp, tiisti emin jasap jatyrmyz. Patsient 2004 jyly týǵan, - deidi Baltabek Qusaiynov.
Aqtóbe oblystyq politsiia departamentiniń málimetinshe, qarashanyń 16-17 kúnderi Qandyaǵash qalasynda mektep oqýshylary tóbelesken. «Buzaqylyq» baby boiynsha qylmystyq is qozǵaldy. Tergeý amaldary júrip jatyr. Ózge eshteńe aita almaimyz» dedi Aqtóbe oblystyq politsiia departamentiniń baspasóz qyzmeti.
Muǵaljar aýdandyq bilim bólimi basshysynyń mindetin atqarýshy Erik Buqarbaevtyń sózinshe, oqýshylar 16 qarasha kúni janjaldasyp, ertesinde taǵy da tóbelesti jalǵastyrǵan. Erik Buqarbaev «toptasyp tóbelesýshilerdiń jalpy sany 15 shaqty bolǵanyn» aitady.
- Istiń mán-jaiyn politsiia tekserip jatyr. Bizdegi málimet boiynsha Qandyaǵash qalasyndaǵy №1, №2 orta bilim beretin mektepter men jergilikti kolledj oqýshylary ózara sózge kelip qalǵan. Pyshaq jaraqatyn alǵan oqýshy aýrýhanaǵa birden barmaǵan. Jaraqaty janyna batyp, jaǵdaiy aýyrlai bastaǵasyn ǵana 18 qarashaǵa qaraǵan túni dárigerler kómegine júgingen, - deidi Erik Buqarbaev.
Buǵan deiin jergilikti BAQ Aqtóbede kámeletke tolmaǵandar arasynda qylmys kóbeigenin habarlaǵan. 10 qarashada Aqtóbede 20-ǵa tarta oqýshy tóbelesip, bir adam qaza tapqan. Politsiia "Buzaqylyq" jáne "Adam óltirý" baptary boiynsha qylmystyq is qozǵady, bir stýdent qamaýǵa alyndy.
