Aqtóbe politseileri eki saǵat boiy jeti jasar Kristina Shýsterdiń ákesi men ógei sheshesin telemunaradan sekirmeýge kóndirgen, alaida, ókinishke qarai, bul esh nátije bergen joq. "Diapazon" basylymynyń jýrnalisteri erli-zaiypty men politseilerdiń arasynda bolǵan áńgimeni videoǵa túsirip alǵan.
Basylymnyń siýjetinde politseilerdiń qyzdyń ákesi Vladimirge sóilep jatqan sáti estiledi: "Vova, tynyshtandyr ony, barlyǵy jaqsy bolady. Biz jaýap beremiz. Vova, sabyrǵa kel, ant beremin, eshteńe de bolmaidy ýaiymdama".
Al áiel bolsa telemunaradan "Ýáde beresizder me?" dep aiǵailap jatady.
Biraz ýaqyt ótken soń saǵat 17.40-ta Vladimir men Ásel telemunaradan sekirip ketip, mert bolady. Politseilerdiń, týystarynyń jáne kórshileriniń olardy toqtatpaq bolǵan áreketteri kómektese almady.
Aita keteiik, Vladimir men Ásel byltyr qyrkúiek aiynan bastap birge turǵan. Osylaisha, jeti jasar Kristinanyń ógei sheshesi paida bolady. Kórshileriniń aitýynsha, Kristina osyǵan deiin kóńildi júrgen, kórshilermen de áńgimelesip turatyn. Ásel úige kelgen soń da barlyǵy jaqsy bolǵan. Qyz ony "ana" dep te ataǵan. Qyrkúiekte Kristina mektepte ádemi bolyp bardy. Ásel onyń shashyn sándi etip jasap berdi. Alaida bir sátte barlyǵy ózgerip ketti. Qyzdyń denesi kógerip júrdi, eshkimmen sóilespeitin, óz-ózimen. Al keiinnen birneshe kúnge joǵalyp ta ketti. Sonda kórshiler bul otbasynda jaisyz jaǵdaidyń bolǵanyna kúdiktene bastaǵan.
Sodan ýchaskelik politsei kelgen. Ol qyzdy shkafta uryp-soǵylǵan kúii tapqan. Qyzdyń ákesi men ógei sheshesinen syrtqa shyqpaý týraly qolhat alǵan.
Basylymnyń málimetinshe, osy jaǵdaiǵa bailanysty erli-zaiypty munaranyń ústine shyǵyp alǵan.
Jeti jasar qyzdyń ákesi men ógei sheshesine qatysty QR Qylmystyq kodeksiniń 105-babynyń 1-bóligi boiynsha ("Ózin-ózi óltirýge deiin jetkizý") sotqa deiingi tergeý júrgizilip jatyr.
Eske salaiyq, oqiǵa 15 mamyrda bolǵan. Erli zaiypty telemunaraǵa shyǵyp, sekirip ketken. Olar oqiǵa ornynda qaza tapty. Keiin erli-zaiyptyǵa qatysty jantúrshigerlik derekter anyqtaldy. Óz kezeginde Aqtóbeniń bilim basqarmasyndaǵylar ákesi men ógei sheshesi telemunaradan sekirip ketip, qaza tapqan jeti jasar Kristina Shýster jaily aityp bergen bolatyn.
