Aqtóbede shoshqa fermasynyń iesine qatysty qylmystyq is qozǵaldy, kásipker úiqamaqta otyr, dep habarlaidy "Ult aqparat".
Aqtóbedegi shoshqa fermasyna qatysty aldymen ákimshilik is qozǵalyp, barlyǵy 7 milliard teńgeden astam aiyppul salyndy. Keiin seriktestik qaita appeliatsiialyq shaǵym túsirdi. Al sol appeliatsiialyq sotta eki aryz sheshimi ózgerissiz qaldyrylyp, sot oryndaýshylary zań aiasynda jumysqa kiristi.
«Qazirgi ýaqytta Aqtóbe oblysy boiynsha jeke sot oryndaýshylary óńirlik palatasyna eki atqarý paraǵy tústi. Birinshisi kóń qoimasyn paidalaný, ekinshisi aǵyndy sýlardyń qorshaǵan ortany lastaýy. Sot oryndaýshylary boryshkerge sot sheshimderin oryndaý týraly habarlama berdi. Merzimi bir apta. Biraq atqarylýy tiis is aýqymy kóp. Bir aptada úlgerýi neǵaibil», - dedi Aqtóbe oblysy boiynsha jeke sot oryndaýshylary óńirlik palatasy basshysynyń orynbasary Qairat Tańqaev.
Sonymen birge shoshqa fermasynyń iesine qatysty qylmystyq is qozǵaldy.
«Ekologiia departamentiniń tekserýinen soń qylmystyq is qozǵaldy. Qylmystyq kodekstiń «Jerdi búldirý» baby boiynsha tergeý júrip jatyr. Seriktestik basshysy Gaik Terterian úiqamaqta otyr. Kúdiktiniń kinási dáleldense, 5 jylǵa deiin bas bostandyǵynan aiyrylýy múmkin», - dedi oblystyq PD tergeý basqarmasynyń aǵa tergeýshisi Aigúl Imanǵazina.
