Aqtóbe qalasynda kópqabatty turǵyn úilerdiń birinde bolǵan qaiǵyly oqiǵanyń mán-jaiy anyqtaldy. Búgin Aizat Ábdisamattyń kúieýi Qaiyrjan Erqasymov buqaralyq aqparat quraldaryna suhbat berdi, dep habarlaidy QazAqparat tilshisi.
«Búkil Qazaqstannyń shyndyqty bilgenin qalaimyn. Aqparat ártúrli taraǵan. Men Aizatty liftten ózim alyp shyqtym. Qyzym úsh jasta. Qyzym birinshi qabattan liftige kirip, keiin Aizat kiredi. Sol aiaǵymen kirgen, oń aiǵyn lift esigi qysyp qaldy. Ekinshi qabattaǵy aralyqta turyp qalǵan. Denesi saý. Aiaǵyn julyp ketpedi. Qyzym saý, qulaǵan joq. Páter ieleri kooperativi trosyn qarap, jóndeý júrgizilgenin aityp jatyr. Shyn máninde torstyń esh qatysy joq. Lift kedergi bolǵan kezde birden ashylýy tiis. Biraq ashylmaǵan», - dedi qaza bolǵan jýrnalist Aizat Ábdisamattyń kúieýi Qaiyrjan Erqasymov.
Sot-saraptama qorytyndysyna súiensek, Aizattyń ókpesi qysylyp qalǵan.
«Ishki qurylysy, ókpesi qysylyp, aýa jetpei qalǵan. Keiin ishki qurylysy jyrtylyp ketken. Aiaǵy kesilip qalǵan degen aqparat shyndyqqa janaspaidy. Oqiǵa ornynda qaza boldy. Kemerevodaǵy oqiǵadan soń órt qaýipsizdigi tekserildi, osy jaǵdaidan soń liftterdi qadaǵalaý bastalady. Páter ieleri kooperativi ne isterin bilmei júr. Shyn máninde, bizdiń lift aptasyna bir ret turyp qalady. Lift tetigi durys emes. Birden ashylmaitynyn burynnan bilemiz», - dedi ol.
Aizat Ábdisamatty kúieýi lift ishinen alyp shyqqan. Qyzyn da ózi shyǵaryp alǵan.
«Qolymmen alyp shyqtym, qan áli qaldy. Balamdy sol kúni aýrýhanaǵa aparyp, teksertip aldym. Aman-esen. Tek «mamam qysylyp qaldy» dep aita beredi», - dedi Qaiyrjan Erqasymov. Onyń aitýynsha, liftte eki esik bolǵan. Qaiǵyly oqiǵa bolǵan kúni onyń bireýi jabylmai qalǵan.
«Men jumystan kele jatqan edim. Maǵan telefon shalyp, «kútemiz» dep aitty. Ajaly shyǵar, sol kúni jumystan kesh shyqtym. Eki ret temirjol ótkelinde turyp qaldym. Úige jaqyndaǵanda bir adamnyń kóligi toqtap qalǵanyn kórip, oǵan da kómektestim. Bir qarasam, adamdar jinalyp qalǵan. Ne boldy dep oiladym. Podezge kirip, birinshi qabattan liftti shaqyrdym. Istemei turdy. «Taǵy istemei qalǵan» dep ekinshi qabatqa kóterilgende, júgirip júrgen adamdardy kórdim. Joǵary kóterile berip, keri buryldym. Suraǵan kezde «jenshina bez soznanie, rebenok plachet» dep jaýap qaitardy. Kishkentai tesikten qaraǵanda qyzymdy kórdim. Ol meni kórip baqyryp jiberdi. Sol kezde jaryq ta bolmady. Anasynyń túrin kórmegeni de jaqsy bolǵan shyǵar. Kóz aldynda bolǵan oqiǵa esinde qalatyn shyǵar», - dedi ol.
Oqiǵa ornyna tótenshe jaǵdailar qyzmeti jetkenshe Qaiyrjan Erqasymov jantalasa áielin qutqarýǵa kirisken.
«Tótenshe jaǵdai qyzmetkerleri kelgenshe ózim shyǵaryp aldym. Qaraǵan kezde edende jatyr dep oilaǵam. Biraq Aizat qystyrylyp, ilinip qalǵan eken», - dedi ol.
