Búgin Aqtóbede oblystaǵy káris ultynyń bastamasymen qazaq halqyna alǵys retinde ornatylǵan músindik kompozitsiianyń ashylýy boldy, dep habarlaidy QazAqparat tilshisi.
Músindik kompozitsiia Tuńǵysh Prezident atyndaǵy ortalyq saiabaqtaǵy Týtuǵyr mańyna ornatyldy.
Sharaǵa oblys ákimi Ońdasyn Orazalin, Qazaqstan halqy Assambleiasy tóraǵasynyń orynbasary Marat Ázilhanov, etno-mádeni birlestikterdiń tóraǵalary qatysty.
«Osydan 85 jyl buryn kárister Qiyr Shyǵysta poiyzǵa otyrǵyzylyp, Qazaqstanǵa kúshtep qonys aýdaryldy. Sol kezde Qazaqstan halqy qiyn jaǵdaida bolǵanymen, káristerge baspana, kiim-keshek, azyq-túlik jaǵynan kómek qolyn sozyp, olardy jaqyn kórshi, otbasy múshesi retinde qarsy aldy. Sol kúnderi qoldaý bildirgen jandardyń qurmetine búgin músindik kompozitsiia ornatyldy», - dep atap ótti Koreia Respýblikasynyń Qazaqstandaǵy Tótenshe jáne Ókiletti Elshisi Ký Hong Sok.
Óz kezeginde oblys ákimi de óz rizashylyǵyn bildirdi.
«Alǵys aitý kúni – qazaqstandyqtardan qoldaý tapqan meiirimdiliktiń, ózara syilastyqtyń, dostyq pen yntymaqtastyqtyń merekesi.
Aqtóbe oblysynda Alǵys aitý kúni bolǵan jarqyn oqiǵa – atalmysh eskertkishtiń ashylýy. Bul bizdiń halyqqa degen shynaiy rizashylyqtyń kýási. Qurmetti elshi, Aqtóbe óńiriniń turǵyndary atynan sizge jáne siz arqyly Koreia Respýblikasynyń búkil halqyna alǵysymdy bildiremin», - dedi oblys ákimi Ońdasyn Orazalin.
Jinalǵandardy Alǵys aitý kúnimen Qazaqstan halqy Assambleiasy tóraǵasynyń orynbasary Marat Ázilhanov ta quttyqtap, Qazaqstan halqy Assambleiasy men etnomádeni birlestikterdiń birqatar múshesin marapattady.
«Aqtóbe oblysynyń káristeri atynan qazaq halqyna alǵys» músindik kompozitsiiasynda qazaq jáne káris áielderiniń músinderi beinelengen. Qazaq áieli káris áieline qonaqjailylyqtyń belgisi retinde kesemen qymyz usynyp tur. Al shańyraqty ustap turǵan qustyń qos qanaty tatýlyqtyń belgisi ispetti. Kompozitsiianyń jalpy biiktigi – 4,7 metr, eni – 4,5 metr.
