Aqtóbe oblysynda tirkelgen jeke kásipkerlerdiń keibiri óziniń biznes iesi ekenin bilmeidi. Kóbi 2000-2005 jyldary jeke kásipker bolyp memlekettik kirister basqarmasyna tirkelip, keiin ony umytyp ketken. Qazir kóbi zeinetke shyǵyp, saýdagerlikti toqtatqan. Sonymen qatar, qaitys bolǵan aqtóbelikter jeke kásipker tiziminen shyǵarylmaǵan. Bul týraly oblystyq kásipkerlik basqarmasynyń basshysy Anar Darjanova aitty, dep habarlaidy Bnews.kz.
«Aqtóbe oblysynda 10 myńǵa jýyq kásipkerlik sýbektisi jumys istemei tur. Onyń 8 myńy qalada. Kásipkerlerdiń tizimi alynyp, zerdeleý jumystary júrgizildi. Nátijesinde jumys istemei turǵan kásipkerlik sýbektisiniń kóbi 2000-2005 jyldary tirkelip, qyzmetin toqtatqan bolyp shyqty. Máselen, avtoparkte jumys isteitin adamdar patent alyp, avtobýsty jaldap, kólik júrgizgen eken. Olar zeinetke shyǵyp ketken. Sonymen qatar, satýshylar da ózinde patenttiń bar ekenin, jeke kásipker retinde oblystyq memlekettik kirister basqarmasynda tirkeýde turǵanyn bilmeitin bolyp shyqty»,- deidi oblystyq kásipkerlik basqarmasynyń basshysy Anar Darjanova.
Basqarma basshysynyń aitýynsha, jeke kásipker retinde tirkelip, keiin basqa oblysqa, tipti, shetelge kóship ketken adamdar da tizimnen shyǵarylmaǵan.
«Germaniia, Ýkrainaǵa kóship ketken, qaza bolǵan kásipkerler de bar bizde. Qaza bolǵan adamdar týraly oblystyq ádilet departamentinen bilip, keiin memlekettik kirister basqarmasynan tirkeýden shyǵarý jumystary júrip jatyr. Bir aptada qaza bolǵan 75 adamnyń málimetin taptyq»,- deidi A.Darjanova.
Statistikalyq málimetke súiensek, oblysta 50 myńnan astam shaǵyn jáne orta biznes sýbektisi tirkelgen. Onda óńirdiń 130 myńnan astam adamy jumys isteidi.
