Aqtóbede qarjy piramidasyn quryp, 3 myńǵa jýyq adamdy aldaǵan top múshelerine qatysty sot úkimi shyqty, dep habarlaidy "Ult aqparat".
№2 Aqtóbe qalalyq sotynda Qylmystyq kodekstiń 217-baby, 3-bóligi 2-tarmaǵy boiynsha qylmystyq is qaraldy. Is materialyna súiensek, 2016 jyldyń mamyr aiy men 2017 jyldyń tamyz aiy aralyǵynda Jaqsybaev pen Jumabaev asa iri kólemde aqsha urlaý maqsatynda «UNNNITY corporation» atty qarjy piramidasyn uiymdastyryp, oǵan basshylyq etti. Al Kazaliev, Moldakárimov, Sharipova, Qarataeva, Abakanova, Rahmanova, Muqasheva jáne Jamekova osy qylmysty jasaýǵa kómektesti.
«UNNNITY corporation» JShS-niń barlyq jumysy azamattardan aqsha alýǵa baǵyttalyp, olardyń bir bóligi paiyz tóleýge jumsaldy. Qalǵanyn uiymdastyrýshylar men olardyń seriktesteri iemdendi.
Kompaniianyń zańsyz qyzmetinen 2 840 jábirlenýshige jalpy somasy 1,1 mlrd teńgege materialdyq zalal keltirildi. Sottalýshylardyń kinási jábirlenýshilerdiń, kýálardyń aiǵaqtary, jaldaý sharttary, saraptama qorytyndylary arqyly dáleldendi», - dep habarlady oblystyq sottyń baspasóz qyzmeti.
Sot úkimimen K.A.Jaqsybaev 6 jyl 6 ai, B.A.Jumabaev 5 jyl 6 ai bas bostandyǵynan aiyrý jazasy taǵaiyndaldy. B.K. Kazalievqa, A.K.Sharipovaǵa, A.M.Moldakárimov, A.T. Abakanova, B.J.Muqasheva , A.M.Rahmanova, G.K. Qarataeva jáne D.K. Jamekova 5 jyldan bas bostandyǵynan aiyryldy. Al A.M.Rahmanova jáne G.K.Qarataeva buryn qylmystyq jaýapqa tartylmaǵany, kámelet jasqa tolmaǵan balalarynyń bar ekeni eskerilip, taǵaiyndalǵan jaza 3 jylǵa keiinge qaldyryldy. Azamattyq talap qoiý aryzdary qanaǵattandyryldy. Sot úkimi zańdy kúshine engen joq.
