3 qarasha, jeksenbi kúni Aqtóbede alǵash ret talantty, eńbekqor jastardy qoldaýǵa arnalǵan «El úmiti» jastar Tuńǵysh Prezident - Elbasy Qorynyń marafony ótti, dep habarlaidy "Ult aqparat".
Aýqymdy forýmǵa QR Premer-Ministriniń orynbasary Berdibek Saparbaev, QR Tuńǵysh Prezidenti – Elbasy Qorynyń atqarýshy direktory Áset Isekeshev, Aqtóbe oblysynyń ákimi Ońdasyn Orazalin arnaiy qatysty. Jas talanttar men kóshbasshylardy qoldaýǵa arnalǵan joba sharasyna Qyzylorda, Aqtóbe, Batys Qazaqstan, Mańǵystaý jáne Atyraý oblystarynyń 3000-ǵa jýyq belsendi jastary qatysty. Bul – jeke tulǵa retinde jan-jaqty damyp, óz isiniń bilikti mamany bolǵan, el damýyna óz úlesin qosyp júrgen jastar.
Berdibek Saparbaev belsendi jastarǵa alǵysyn bildirdi.
"Táýelsizdiktiń alǵashqy kúninen bastap Tuńǵysh Prezident - Elbasy Nursultan Nazarbaev jastardy qoldaý men damytýǵa úlken kóńil bóldi. Memleket Basshysy Qasym-Jomart Toqaev jastardy qoldap, 2020 jyldy eriktiler jyly dep jariialady. Búginde elimizde 30 myńǵa jýyq daryndy bala bar, 100-den astam mamandandyrylǵan mektepter men bilim berý ortalyqtary jumys jasaidy. 11 oblysta respýblikalyq "Daryn"ortalyǵy jumys isteidi. Biyl myńnan astam bala halyqaralyq konkýrstar men olimpiadalardyń jeńimpazdary men júldegerleri atandy. Elbasynyń "El úmiti" bastamasy aiasynda 1000-nan astam daryndy balalar irikteletin bolady. Olarǵa memleket tarapynan qoldaý kórsetiledi. El Úkimeti jas urpaqty qoldaý úshin barlyq kúsh-jigerdi jumsady. Bilimdi, talantty jáne deni saý jastar - ultymyzdyń bolashaǵy", - dedi Berdibek Saparbaev.
Marafonǵa jeke óz jolyn bastap jatqan jalyndy jastarmen qatar, bilim men ǵylym, biznes jáne meditsina, mádeniet pen sport, ekonomika jáne qoǵamdyq ómirde biik belesterge jetken, óz tájiribesimen bólise alatyn jas mamandar da qatysty. Aqtóbedegi marafon – Elbasynyń «El úmiti» bastamasynyń aiasynda ótkizilgen alǵashqy sharalardyń biri. Bastama talantty balalar men jastardy keshendi qoldaýdy kózdeidi. Bul úshin birqatar jobalardy júzege asyrý josparlanyp otyr.QR Tuńǵysh Prezidenti – Elbasy Qorynyń atqarýshy direktory Áset Isekeshev marafonnyń ashylý saltanatynda «El úmiti» jastarǵa áleýmettik lift bolatynyn jetkizdi.
"Biz álemnen artta qalmaýǵa tiispiz. Bul rette memleket kóp nárse jasap jatyr. «Jas Kásipker», «Jas Maman», «Bolashaq», «Daryn» jáne basqa da baǵdarlamalar bar.
«El Úmiti» bastamasy aiasynda jastardy qoldaýǵa arnalǵan birqatar jobany qolǵa alamyz. Ár balanyń ózindik talanty bar. Ony tek ashý kerek. Sondyqtan, eń aldymen, qazir ár aimaqta «Daryn» ortalyqtary kúsheitiletin bolady. Ár balanyń áleýetin ashý úshin, qaida oqi alady, nege kóbirek beiim ekenin anyqtaý úshin diagnostika jasalady. Odan bólek taǵy da basqa jobalar bolady. Mysaly, shetelde - Kremnii alqabyna, Singapýrǵa saparlar, Kembridjge oqytý týrlary. Qazir bul máselelerdi pysyqtap jatyrmyz", - dedi Áset Isekeshov.
Qazir Qor kóshbasshylyq baǵdarlamasy, balalardyń áleýetin anyqtaý júiesi, yntalandyrý quraldary (onyń ishinde álemniń jetekshi JOO-da tájiribe jinaý), olimpiada jeńimpazdary men daryndy jastarǵa granttyq qoldaý kórsetý júiesi syndy jobalardy qarastyryp jatyr.
"El úmiti" marafonyna Aqtóbe oblysynan qatysqan jas kásipkerdiń biri Janna Altynbaeva. Ol Aqtóbe qalasynan 2016 jyly týristerge arnap «Nice hostel» halyqaralyq standarttarǵa sai keletin qonaq úi ashqan. 30 jastaǵy aqtóbelik biznesmen AQSh-ta tájiribe almasý maqsatynda kóptegen jerlerde jumys jasady.
Al, Atyraý óńirinen kelgen qatysýshy Nurlan Azamatov «Family» oqý ortalyǵynyń basshysy. 2012 jyldan beri ashylǵan ortalyq azamattarǵa sóileý mánerin,oiyn durys jetkizý, oratorlyq ónerdi úiterý treningimen ainalysady. Jas izdenimpaz 2014 jyly Máskeý qalasyndaǵy Ritorika jáne sheshendik óner ýniversitetinde bilim alǵan.
Shara barysynda qatysýshylar óz tájiribelerimen bólisti. Olardy eńbek etip, izdenýge shaqyrdy. Memleket tarapynan kórsetilip jatqan túrli baǵdarlamalar men qoldaýlar úshin alǵystaryn jetkizdi.
Elbasy Nursultan Nazarbaevtyń «El úmiti» bastamasyn Qor úkimet, oblys ákimdikteri men biznes-qaýymdastyq jáne Úkimettik emes uiymdarmen birlesip júzege asyrady.
«Qonys» sport saraiynda ótken kesh qazaq estradasy juldyzdarynyń óner kórsetýimen aiaqtaldy.
