Aqtóbede muǵalimderge úiiniń kirin jýǵyzyp, tamaǵyn jasatqan mektep direktory qyzmetinen ketti. Aýdandyq mektepte shyqqan daýǵa qatysty oblystyq bilim basqarmasynyń basshysy túsinikteme berdi, - dep habarlaidy óńirdegi NUR.KZ tilshisi.
Aqtóbedegi Qarǵaly aýdany Josaly aýylyndaǵy mektepte ata-analar men muǵalimder BAQ ókilderine jantúrshigerlik jaǵdaidy baiandaǵan bolatyn.
Mektep direktory muǵalimder men qolastyndaǵy qyzmetkerlerin úiiniń sharýasyna jumsaǵan. Balasyn baqqyzǵan, kirin jýǵyzǵan, tamaǵyn pisirtken. Tamaqty talǵap iship, buiyryp sóileitin direktordyń aldynda qulsha jorǵalaǵan mektep qyzmetkerleri ashynyp bas kótergen edi. Olar jazǵan aryzda ózderi jumystan shyǵyp ketpeý úshin aitqanyna kónip, aidaýyna júrgenderi baiandalǵan. Oǵan sebep joq emes.
Mektep direktorynyń kúieýi aýdanda máslihat depýtaty. Shydamdary taýsylǵan ustazdar naýryz aiynda oblys ákimdigine, prokýratýraǵa aryz jazǵan.
«Josaly aýylynyń turǵyndarynan mektep direktorynyń ústinen aryz tústi. Aryzǵa bailanysty arnaiy komissiia qurylyp, jumys jasalyp jatyr. Keshe mektep direktorymen, aýyl turǵyndarymen ózim kezdestim. Túsinispeýshilik naýryzda bastalǵan. Mektep direktory negizsiz tórt qyzmetkerdi jumystan shyǵarǵan.
Eki adam densaýlyǵyna bailanysty eńbekke jaramsyz qujaty bolǵanyna qaramastan jumystan shyǵarylǵan. Eki adam óz erkimen jumystan shyǵýǵa aryz jazǵan. Qazirgi ýaqytta jumystan shyǵarylǵan tórt adamdy qaita ornalastyrý sharalary júrgizilip jatyr», – dedi oblystyq bilim basqarmasynyń basshysy Sáýle Ómirbekova.
Bilim basqarmasy ýshyqqan mektep máselesin der kezinde qolǵa almaǵanyn moiyndady. Muǵalimderdi qoldaý úshin ata-analar balalaryn sabaqqa jibermei, muǵalimder jýrnalisterden kómek suraǵan kezde ǵana bilim basqarmasy mektepke barǵan. 18 oqýshy ustazdaryn qoldaý úshin eki kún sabaqqa barmai qalǵan. Saparbaevtan únemi syn estip, «ótirikshi» sheneýnik atanǵan oblystyq bilim basqarmasynyń basshysy shý shyqqan mektepke eki aidan keiin ǵana barǵanyn moiyndady.
«Mektepke keshe bardym. Oǵan deiin barǵan joqpyn. Mektep direktory mektepte jasaityn kelinshekterdi úiine shaqyryp tamaq jasatqan. Direktordyń ózi olardan kómek suradym dep aityp otyr. Men tekseretin quzyrly mekeme emespin. Biraq qyzmetkerlerdiń direktordyń úiinde jumys jasaǵany anyqtalyp otyr», – deidi Sáýle Ómirbekova.
Aýdandaǵy Josaly aýyldyq okrýginde orta mektepti 14 jyl basqarǵan Gúlmira Biisovaǵa qatysty qazir prokýratýra mamandary tekseris júrgizip jatyr. Bilim basqarmasynyń basshysy mektep direktorynyń óz erkimen jumystan shyǵýǵa aryz jazǵanyn aitty.
