اقتٶبەدە مۇعالٸمدەرگە ٷيٸنٸڭ كٸرٸن جۋعىزىپ, تاماعىن جاساتقان مەكتەپ ديرەكتورى قىزمەتٸنەن كەتتٸ. اۋداندىق مەكتەپتە شىققان داۋعا قاتىستى وبلىستىق بٸلٸم باسقارماسىنىڭ باسشىسى تٷسٸنٸكتەمە بەردٸ, - دەپ حابارلايدى ٶڭٸردەگٸ NUR.KZ تٸلشٸسٸ.
اقتٶبەدەگٸ قارعالى اۋدانى جوسالى اۋىلىنداعى مەكتەپتە اتا-انالار مەن مۇعالٸمدەر باق ٶكٸلدەرٸنە جانتٷرشٸگەرلٸك جاعدايدى بايانداعان بولاتىن.
مەكتەپ ديرەكتورى مۇعالٸمدەر مەن قولاستىنداعى قىزمەتكەرلەرٸن ٷيٸنٸڭ شارۋاسىنا جۇمساعان. بالاسىن باققىزعان, كٸرٸن جۋعىزعان, تاماعىن پٸسٸرتكەن. تاماقتى تالعاپ ٸشٸپ, بۇيىرىپ سٶيلەيتٸن ديرەكتوردىڭ الدىندا قۇلشا جورعالاعان مەكتەپ قىزمەتكەرلەرٸ اشىنىپ باس كٶتەرگەن ەدٸ. ولار جازعان ارىزدا ٶزدەرٸ جۇمىستان شىعىپ كەتپەۋ ٷشٸن ايتقانىنا كٶنٸپ, ايداۋىنا جٷرگەندەرٸ باياندالعان. وعان سەبەپ جوق ەمەس.
مەكتەپ ديرەكتورىنىڭ كٷيەۋٸ اۋداندا مەسليحات دەپۋتاتى. شىدامدارى تاۋسىلعان ۇستازدار ناۋرىز ايىندا وبلىس ەكٸمدٸگٸنە, پروكۋراتۋراعا ارىز جازعان.
«جوسالى اۋىلىنىڭ تۇرعىندارىنان مەكتەپ ديرەكتورىنىڭ ٷستٸنەن ارىز تٷستٸ. ارىزعا بايلانىستى ارنايى كوميسسييا قۇرىلىپ, جۇمىس جاسالىپ جاتىر. كەشە مەكتەپ ديرەكتورىمەن, اۋىل تۇرعىندارىمەن ٶزٸم كەزدەستٸم. تٷسٸنٸسپەۋشٸلٸك ناۋرىزدا باستالعان. مەكتەپ ديرەكتورى نەگٸزسٸز تٶرت قىزمەتكەردٸ جۇمىستان شىعارعان.
ەكٸ ادام دەنساۋلىعىنا بايلانىستى ەڭبەككە جارامسىز قۇجاتى بولعانىنا قاراماستان جۇمىستان شىعارىلعان. ەكٸ ادام ٶز ەركٸمەن جۇمىستان شىعۋعا ارىز جازعان. قازٸرگٸ ۋاقىتتا جۇمىستان شىعارىلعان تٶرت ادامدى قايتا ورنالاستىرۋ شارالارى جٷرگٸزٸلٸپ جاتىر», – دەدٸ وبلىستىق بٸلٸم باسقارماسىنىڭ باسشىسى سەۋلە ٶمٸربەكوۆا.
بٸلٸم باسقارماسى ۋشىققان مەكتەپ مەسەلەسٸن دەر كەزٸندە قولعا الماعانىن مويىندادى. مۇعالٸمدەردٸ قولداۋ ٷشٸن اتا-انالار بالالارىن ساباققا جٸبەرمەي, مۇعالٸمدەر جۋرناليستەردەن كٶمەك سۇراعان كەزدە عانا بٸلٸم باسقارماسى مەكتەپكە بارعان. 18 وقۋشى ۇستازدارىن قولداۋ ٷشٸن ەكٸ كٷن ساباققا بارماي قالعان. ساپارباەۆتان ٷنەمٸ سىن ەستٸپ, «ٶتٸرٸكشٸ» شەنەۋنٸك اتانعان وبلىستىق بٸلٸم باسقارماسىنىڭ باسشىسى شۋ شىققان مەكتەپكە ەكٸ ايدان كەيٸن عانا بارعانىن مويىندادى.
«مەكتەپكە كەشە باردىم. وعان دەيٸن بارعان جوقپىن. مەكتەپ ديرەكتورى مەكتەپتە جاسايتىن كەلٸنشەكتەردٸ ٷيٸنە شاقىرىپ تاماق جاساتقان. ديرەكتوردىڭ ٶزٸ ولاردان كٶمەك سۇرادىم دەپ ايتىپ وتىر. مەن تەكسەرەتٸن قۇزىرلى مەكەمە ەمەسپٸن. بٸراق قىزمەتكەرلەردٸڭ ديرەكتوردىڭ ٷيٸندە جۇمىس جاساعانى انىقتالىپ وتىر», – دەيدٸ سەۋلە ٶمٸربەكوۆا.
اۋدانداعى جوسالى اۋىلدىق وكرۋگٸندە ورتا مەكتەپتٸ 14 جىل باسقارعان گٷلميرا بيٸسوۆاعا قاتىستى قازٸر پروكۋراتۋرا ماماندارى تەكسەرٸس جٷرگٸزٸپ جاتىر. بٸلٸم باسقارماسىنىڭ باسشىسى مەكتەپ ديرەكتورىنىڭ ٶز ەركٸمەن جۇمىستان شىعۋعا ارىز جازعانىن ايتتى.
