Aqtóbe oblysynda shekteý sharasy kúsheitiledi. Senbi, jeksenbi kúnderi sebepsiz dalaǵa shyǵýǵa bolmaidy, dep habarlaidy "Ult aqparat".
26 maýsym kúni saǵat 22:00-den bastap 29 maýsym kúngi saǵat 00:00-ge deiin jáne odan keiin epidemiologiialyq jaǵdai turaqtanǵanǵa deiin árbir demalys kúnderi shekteý jáne karantin sharalary ýaqytsha kúsheitiledi.
«Aqtóbe qalasy boiynsha jaiaý jáne jeke kólikpen júrýge tyiym salynsyn. Tek turǵylyqty jerinen jumys ornyna deiin jáne keri qaitýǵa bolady. Ol úshin jumys ornynan anyqtama bolýy tiis. Azyq-túlik taýarlaryn, dári-dármek preparattaryn jáne meditsinalyq buiymdardy alýǵa barýǵa bolady. Úi janýarlaryn turǵylyqty jerine jaqyn jerde ǵana serýendetý mindet», - dedi oblystyq taýarlar men kórsetiletin qyzmetter sapasy men qaýipsizdigin baqylaý departamentiniń basshysy Nursulý Berkimbaeva.
Onyń aitýynsha, 65 jastan asqan adamdar asa qajet bolmasa, kóshege shyqpaýy tiis. Ári saýda ortalyqtarynda, bazarlarda, qoǵamdyq kólikterde, azyq-túlik jáne turmystyq dúkenderinde, qyzmet kórsetý oryndarynda jáne kópshilik jinalatyn oryndarda dezinfektsiialyq sharalar kúsheitiledi.
Aita keteiik, sońǵy táýlikte óńirde 22 adam aýyryp, infektsiialyq gospitalǵa jatqyzyldy. Ósim 3 paiyzdan asty. Bireýi Mańǵystaý oblysynyń týmasy. Baiǵaninnen 3, Shalqardan 1 adam anyqtaldy. Ózgesi Aqtóbe qalasynyń turǵyny.
Indet juqtyrǵandardyń kóbi jedel respiratorlyq virýstyq infektsiia simptomdarymen dáriger kómegine júgingen. Arasynda 1 jasar bala bar. Oblysta barlyǵy 693 adam dertke shaldyqsa, onyń teń jartysynan astamy emdelip shyqqan.
Al eshqandai klinikalyq belgisi baiqalmaityndar qatary 433-ke jetti. Bir táýlikte oblysta 44 tasymaldaýshy tirkeldi.
