Aqtóbede 22 sáýir tańǵy ýaqytta ózi turyp jatqan páterde pyshaq jaraqatynan kóz jumǵan áieldiń ólimine qatysty tyń derek shyqty. Marqum Móldir Tomarova qaladaǵy meditsina ortalyqtarynyń birinde dáriger bolyp qyzmet etken. Onyń kórshileri qandy oqiǵa týraly kórgen-bilgenin aityp berdi, dep habarlaidy "Ult aqparat" kaz.nur.kz basylymyna silteme jasap.
Aqtóbe qalalyq politsiia departamentiniń ókilderi 22 sáýirde 34 jastaǵy áiel tanysynyń qolynan kóz jumǵanyn málim etken bolatyn. Qandy oqiǵa týraly politsiiaǵa marqumnyń kórshileri habarlaǵan.
Portal tilshisi oqiǵa ornyna baryp, marqumnyń kórshilerimen tildesti. Qandy oqiǵa bolǵan páter mórlengen. Oqiǵa bolǵan úidiń turǵyny jatyn kiimimen júrgen qyzdy dálizde shashynan súiregen er adamdy kórgenin aitty.
"Politsiiaǵa men habarlastym. Ol kezde saǵat tańǵy 5:02 ýaqytty kórsetip turdy. Qyzdyń jan daýysy shyǵyp jatty. Qarsy esikten de kórshimiz shyqty. Politsiia 15 minýttan keiin, TJD qyzmetkerleri 40 minýt shamasynda keldi. Úidiń esigi bir saǵat ainalasynda ashyldy. Tiri dep oiladym. Kómektesý úshin júgirip bardym. Biraq qyzdyń keýde tusy qan eken. Juqa jatyn kiimimen jatty. Bári kóz aldymda bolǵandyqtan ózim de qinalyp júrmin. Kómek ýaqytynda bolsa, qyz aman qalar ma edi.
Osyǵan deiin de ol qyzdyń túnde dálizde jylap otyrǵanyn kórgenmin. Biraq ol kezde úiine kirip ketti. Qasyndaǵy kórshilerine «bireý gúl ákelip berse almańdar, politsiiaǵa aryz bersem de qoimaidy, qorqamyn» degen. Barlyq jaǵdaidy tergeýshige baiandadym, sotta da aityp beremin", - deidi marqumnyń kórshisi.
Aitýynsha, bul – memlekettik qyzmetkerlerge arnalǵan úi. Balkony ashyq, qaýipsizdik saqtalmaǵan. Turǵyndar kim kóringen kirip, óltirip ketýi múmkin dep qorqady.
Qaiǵyly oqiǵa bolǵan úidiń turǵyndary mundai oqiǵanyń buryn bolmaǵanyn aitty.
"Balkonnan kirgen dep estidik. Qyz dálizge shyǵyp qashqan. Qyz qatty aiqailaǵan. Mundai jaǵdai buryn bolmady. Qorqynyshty. Ol qyzdy qatty tanymaimyz. Biraq aýladan kórgenbiz", - deidi marqumnyń kórshisi Mahabbat Jamantaiqyzy.
Al marqumnyń áriptesteri bul oqiǵany áleýmettik jeliden estigen. Qaladaǵy jeke meditsina ortalyǵy qyzmetkerleriniń aitýynsha, endokrinolog dáriger jaqynda ǵana eńbek demalysyna shyqqan.
"Ol kisi bizde 9 jyldan asa jumys istedi. Alǵashynda terapevt bolyp keldi. Keiin rezidentýraǵa túsip, endokrinolog dárigeri boldy. Aýrýhanadaǵy jaýapty jumystardy atqardy. Bilikti dáriger edi. Ókinishti. Ol oqiǵa bolǵan kezde eńbek demalysyna shyqqan. Qaiǵyly habardy áleýmettik jeliden oqydyq. Qiyn jaǵdai. Tóbemizden jai túskendei boldy. Erteń janazasy bolady. Aqtyq saparǵa shyǵaryp salýǵa áriptester ketti", - deidi Aqtóbe meditsinalyq ortalyǵy ókilderi.
Bilikti endokrinolog dárigerdiń ólimine qatysty politsiia tergeý júrgizip jatyr. Quzyrly organ kúdikti marqumnyń kóligine minip qashty degen málimetti rastamady.
"Kólik marqumǵa tiesili emes. Jalǵa alǵan. Oqiǵany birinshi kórshileri habarlady. Kisi óltirý faktisi boiynsha tergeý júrip jatyr", - dep habarlady Aqtóbe oblystyq PD-niń baspasóz hatshysy.
