Qazaqstanda psihikalyq densaýlyq saqtaý uiymdarynyń jelisin keńeitý josparlanyp otyr. 2027–2031 jyldarǵa arnalǵan keshendi jospar aiasynda elde 81 alǵashqy meditsinalyq ortalyq pen aýtizm spektriniń buzylysy bar balalarǵa arnalǵan 189 kúndizgi bolý bólimshesi ashylady, dep habarlaidy ult.kz.
Jańa bólimsheler balalarǵa turǵylyqty jeri boiynsha ońaltý kýrsynan ótýge múmkindik beredi. Osylaisha, shalǵai aýdandardyń turǵyndary da erte diagnostika, emdeý jáne ońaltý qyzmetterine qol jetkize alady. Balalardy táýlik boiy aýrýhanaǵa jatqyzýdyń qajeti bolmaidy.
Densaýlyq saqtaý ministrligi Meditsinalyq kómekti uiymdastyrý departamentiniń direktory Gúlnar Sársenbaevanyń aitýynsha, jańa bólimsheler jumys istep turǵan psihikalyq densaýlyq ortalyqtary men aýdandyq aýrýhanalar bazasynda ashylady.
Qazir Qazaqstanda 20 óńirlik ortalyq, 101 alǵashqy meditsinalyq ortalyq jáne beiindi 212 kabinet jumys isteidi. Taǵy 81 ortalyqqa qajettilik 12 oblysta anyqtalǵan.
Densaýlyq saqtaý ministri Aqmaral Álnazarova psihikalyq densaýlyq máselelerine basymdyq berilip otyrǵanyn atap ótti.
«Bizdiń mindetimiz – patsienttiń qai jerde turatynyna qaramastan, barlyq óńirde mamandandyrylǵan kómektiń qoljetimdiligin qamtamasyz etý», – dedi ministr.
Mamandar tapshylyǵy da sheshiledi
Keshendi jospar aiasynda balalar men eresekter psihiatrlarynyń tapshylyǵyn joiý máselesi de qarastyrylǵan. Densaýlyq saqtaý ministri óńirlerge osy saladaǵy mamandardy daiarlaýǵa arnalǵan bilim berý granttarynyń sanyn kóbeitýdi jáne meditsina qyzmetkerlerine áleýmettik qoldaý sharalaryn engizýdi tapsyrǵan.
Budan bólek, jospar meditsinalyq mekemelerdiń ǵimarattaryn jańǵyrtýdy, zamanaýi jabdyqtar satyp alýdy, ambýlatoriialyq kómekti damytýdy jáne tegin dári-dármekpen qamtamasyz etý júiesin jetildirýdi qamtidy.
