قازاقستاندا پسيحيكالىق دەنساۋلىق ساقتاۋ ۇيىمدارىنىڭ جەلٸسٸن كەڭەيتۋ جوسپارلانىپ وتىر. 2027–2031 جىلدارعا ارنالعان كەشەندٸ جوسپار اياسىندا ەلدە 81 العاشقى مەديتسينالىق ورتالىق پەن اۋتيزم سپەكترٸنٸڭ بۇزىلىسى بار بالالارعا ارنالعان 189 كٷندٸزگٸ بولۋ بٶلٸمشەسٸ اشىلادى, دەپ حابارلايدى ult.kz.
جاڭا بٶلٸمشەلەر بالالارعا تۇرعىلىقتى جەرٸ بويىنشا وڭالتۋ كۋرسىنان ٶتۋگە مٷمكٸندٸك بەرەدٸ. وسىلايشا, شالعاي اۋدانداردىڭ تۇرعىندارى دا ەرتە دياگنوستيكا, ەمدەۋ جەنە وڭالتۋ قىزمەتتەرٸنە قول جەتكٸزە الادى. بالالاردى تەۋلٸك بويى اۋرۋحاناعا جاتقىزۋدىڭ قاجەتٸ بولمايدى.
دەنساۋلىق ساقتاۋ مينيسترلٸگٸ مەديتسينالىق كٶمەكتٸ ۇيىمداستىرۋ دەپارتامەنتٸنٸڭ ديرەكتورى گٷلنار سەرسەنباەۆانىڭ ايتۋىنشا, جاڭا بٶلٸمشەلەر جۇمىس ٸستەپ تۇرعان پسيحيكالىق دەنساۋلىق ورتالىقتارى مەن اۋداندىق اۋرۋحانالار بازاسىندا اشىلادى.
قازٸر قازاقستاندا 20 ٶڭٸرلٸك ورتالىق, 101 العاشقى مەديتسينالىق ورتالىق جەنە بەيٸندٸ 212 كابينەت جۇمىس ٸستەيدٸ. تاعى 81 ورتالىققا قاجەتتٸلٸك 12 وبلىستا انىقتالعان.
دەنساۋلىق ساقتاۋ مينيسترٸ اقمارال ەلنازاروۆا پسيحيكالىق دەنساۋلىق مەسەلەلەرٸنە باسىمدىق بەرٸلٸپ وتىرعانىن اتاپ ٶتتٸ.
«بٸزدٸڭ مٸندەتٸمٸز – پاتسيەنتتٸڭ قاي جەردە تۇراتىنىنا قاراماستان, بارلىق ٶڭٸردە مامانداندىرىلعان كٶمەكتٸڭ قولجەتٸمدٸلٸگٸن قامتاماسىز ەتۋ», – دەدٸ مينيستر.
ماماندار تاپشىلىعى دا شەشٸلەدٸ
كەشەندٸ جوسپار اياسىندا بالالار مەن ەرەسەكتەر پسيحياترلارىنىڭ تاپشىلىعىن جويۋ مەسەلەسٸ دە قاراستىرىلعان. دەنساۋلىق ساقتاۋ مينيسترٸ ٶڭٸرلەرگە وسى سالاداعى مامانداردى دايارلاۋعا ارنالعان بٸلٸم بەرۋ گرانتتارىنىڭ سانىن كٶبەيتۋدٸ جەنە مەديتسينا قىزمەتكەرلەرٸنە ەلەۋمەتتٸك قولداۋ شارالارىن ەنگٸزۋدٸ تاپسىرعان.
بۇدان بٶلەك, جوسپار مەديتسينالىق مەكەمەلەردٸڭ عيماراتتارىن جاڭعىرتۋدى, زاماناۋي جابدىقتار ساتىپ الۋدى, امبۋلاتورييالىق كٶمەكتٸ دامىتۋدى جەنە تەگٸن دەرٸ-دەرمەكپەن قامتاماسىز ەتۋ جٷيەسٸن جەتٸلدٸرۋدٸ قامتيدى.
