Aqtóbede burynǵy áielin ólimshi etip sabap, betin pyshaqpen tilip tastaǵan turǵyn 21 kúnnen keiin qamaldy. Bul týraly Aqtóbe oblystyq politsiia departamentiniń baspasóz qyzmeti habarlady, dep jazady Azattyq agenttigi.
Politsiianyń málimetinshe, kúdiktiniń ústinen o basta «densaýlyqqa qasaqana aýyrlyǵy ortasha ziian keltirdi» degen aiyppen is qozǵalǵan. Kúdiktini qolhatpen bosatqan. Keiin zorlyq kórgen áiel Ainagúl Bekenovanyń fotosy jelige tarap, qoǵam narazylyǵyn týdyrǵan edi. Osydan keiin 3 sáýir kúni politsiia kúdiktini «densaýlyqqa qasaqana aýyr ziian keltirý» babymen qamaýǵa alǵanyn habarlady.
Aqtóbe qalasynyń 28 jastaǵy turǵyny Ainagúl Bekenova kúieýinen 2018 jyly ajyrasqan. On jastaǵy qyzy bar. Áielder quqyǵyn qorǵaýmen ainalysatyn «NeMolchiKZ» qorynyń dereginshe, biyl 13 naýryz kúni Bekenovanyń jumys ornyna kelgen burynǵy kúieýi ony ólimshi etip sabap, betin pyshaqpen tilip tastaǵan.
- Adamnyń bet álpeti qalpyna kelmeitindei etip buzylǵan jaǵdaida qylmystyq is birden «densaýlyqqa qasaqana aýyr ziian keltirý» babymen qozǵalýy kerek edi. Biraq politsiia bul iske turmystaǵy zorlyq-zombylyq retinde qaraǵan. Kúdiktini úshinshi táýlikke jetkizbei bosatyp jibergen. Jábirlenýshi áiel burynǵy kúieýiniń «Mendik bolmasań, eshkimge de buiyrmaisyń! Men seni óltiremin!» degen. Iaǵni, ol adam óltirýge oqtalǵan, - deidi qor jetekshisi Dina Smailova.
Jábirlenýshi Ainagúl Bekenova 3 sáýirde advokatymen birge politsiia ýchaskesine baryp, burynǵy kúieýine taǵylǵan aiyptyń qaita aýyrlaǵanyn bilgen. Bekenovanyń ózi de «ol meniń densaýlyǵyma aýyr ziian keltirip qana qoiǵan joq, meni óltirýge oqtaldy» dep sanaidy.
