اقتٶبەدە بۇرىنعى ەيەلٸن ٶلٸمشٸ ەتٸپ ساباپ, بەتٸن پىشاقپەن تٸلٸپ تاستاعان تۇرعىن 21 كٷننەن كەيٸن قامالدى. بۇل تۋرالى اقتٶبە وبلىستىق پوليتسييا دەپارتامەنتٸنٸڭ باسپاسٶز قىزمەتٸ حابارلادى, دەپ جازادى ازاتتىق اگەنتتٸگٸ.
پوليتسييانىڭ مەلٸمەتٸنشە, كٷدٸكتٸنٸڭ ٷستٸنەن و باستا «دەنساۋلىققا قاساقانا اۋىرلىعى ورتاشا زييان كەلتٸردٸ» دەگەن ايىپپەن ٸس قوزعالعان. كٷدٸكتٸنٸ قولحاتپەن بوساتقان. كەيٸن زورلىق كٶرگەن ەيەل ايناگٷل بەكەنوۆانىڭ فوتوسى جەلٸگە تاراپ, قوعام نارازىلىعىن تۋدىرعان ەدٸ. وسىدان كەيٸن 3 سەۋٸر كٷنٸ پوليتسييا كٷدٸكتٸنٸ «دەنساۋلىققا قاساقانا اۋىر زييان كەلتٸرۋ» بابىمەن قاماۋعا العانىن حابارلادى.
اقتٶبە قالاسىنىڭ 28 جاستاعى تۇرعىنى ايناگٷل بەكەنوۆا كٷيەۋٸنەن 2018 جىلى اجىراسقان. ون جاستاعى قىزى بار. ەيەلدەر قۇقىعىن قورعاۋمەن اينالىساتىن «نەمولچيKZ» قورىنىڭ دەرەگٸنشە, بيىل 13 ناۋرىز كٷنٸ بەكەنوۆانىڭ جۇمىس ورنىنا كەلگەن بۇرىنعى كٷيەۋٸ ونى ٶلٸمشٸ ەتٸپ ساباپ, بەتٸن پىشاقپەن تٸلٸپ تاستاعان.
- ادامنىڭ بەت ەلپەتٸ قالپىنا كەلمەيتٸندەي ەتٸپ بۇزىلعان جاعدايدا قىلمىستىق ٸس بٸردەن «دەنساۋلىققا قاساقانا اۋىر زييان كەلتٸرۋ» بابىمەن قوزعالۋى كەرەك ەدٸ. بٸراق پوليتسييا بۇل ٸسكە تۇرمىستاعى زورلىق-زومبىلىق رەتٸندە قاراعان. كٷدٸكتٸنٸ ٷشٸنشٸ تەۋلٸككە جەتكٸزبەي بوساتىپ جٸبەرگەن. جەبٸرلەنۋشٸ ەيەل بۇرىنعى كٷيەۋٸنٸڭ «مەندٸك بولماساڭ, ەشكٸمگە دە بۇيىرمايسىڭ! مەن سەنٸ ٶلتٸرەمٸن!» دەگەن. ياعني, ول ادام ٶلتٸرۋگە وقتالعان, - دەيدٸ قور جەتەكشٸسٸ دينا سمايلوۆا.
جەبٸرلەنۋشٸ ايناگٷل بەكەنوۆا 3 سەۋٸردە ادۆوكاتىمەن بٸرگە پوليتسييا ۋچاسكەسٸنە بارىپ, بۇرىنعى كٷيەۋٸنە تاعىلعان ايىپتىڭ قايتا اۋىرلاعانىن بٸلگەن. بەكەنوۆانىڭ ٶزٸ دە «ول مەنٸڭ دەنساۋلىعىما اۋىر زييان كەلتٸرٸپ قانا قويعان جوق, مەنٸ ٶلتٸرۋگە وقتالدى» دەپ سانايدى.
