Aqtóbe oblysy, Muǵaljar aýdany, Temir most aýylyndaǵy balalar eki kúnnen beri sabaqqa barmai júr. Búgin ata-analar jinalyp, oblys ákiminen jańa mektep salyp berýdi surady, dep habarlaidy QazAqparat.
Temir most aýylynyń turǵyndary búgin oblys ákimdigine jinalyp, óńir basshysy Ońdasyn Orazalinmen kezdesýdi surady. Olar 1936 jyly temirjol vokzaly retinde salynǵan ǵimarattyń qaýipti ekenin, osyǵan qarai eki kún boiy balalaryn sabaqqa jibermegenin aitty.
«Mektebimiz apatty jaǵdaida tur. Sondyqtan men qazir balalarymdy sabaqqa jibere almai otyrmyn. Tóbesi qulaiyn dep tur. Oshaq tartpaidy, ot jaqsa janbaidy. Ys basyp ketedi. Men balam ýlanyp qalady dep qorqamyn. Oqys jaǵdai bolsa kim jaýap beredi?», - dedi aýyl turǵyny Gúlmira Tólegenova.
Barlyǵy oblys ortalyǵyna 10-nan astam aýyl turǵyny keldi. Olar mekteptiń 9 jyldyq bolyp salynǵanyn qalaidy.
«Muǵaljar aýdany, Temir most beketinen kelip turmyn. Bizge mektep kerek. Osy máseleni kóterip turmyz. Ózim temirjolshymyn, qazir zeinetke shyqtym. Úlken otbasymyz, nemerelerimniń segizi mektep jasynda. Olardyń jaqsy mektepte oqyǵanyn qalaimyn. Biz 9 jyldyq mektep bolsa deimiz. Qazirgi mekteptiń jaǵdaiy jaman. Apatty jaǵdaida tur. Bul negizinde 1936 jyly salynǵan temirjol vokzaly. Qanshama adam kelip qarady, biraq oń shemimin kórmedim. Qazir aýylda 98 bala bar. Olardyń kóbi mektep bolmaǵan soń ár jerde júr», - aýyl turǵyny Raýshan Baidilova.
Temir most aýylynda mektep salý máselesi 2017 jyly kóterilip, jobalyq-smetalyq qujat ázirlendi. Qazirgi kezde onyń merzimi ótip ketken.
«Temir most mektebiniń qurylysyna qajetti jobalyq-smetalyq qujat qaita jasalady. Aiaqtalǵan soń qurylys jumystary bastalady. Bul birneshe saraptamadan ótýi kerek. Keiin biýdjetten qarjy suraimyz, sosyn qurylys júredi. Burynǵy 200 mln teńge bolsa, qazir 360-400 mln tg bolýy múmkin», - dedi oblystyq qurylys basqarmasynyń basshysy Naǵymjan Aldiiarov.
Keiin aýyl turǵyndarynyń aldyna oblys ákiminiń orynbasary da shaqty. Ol biyl mektep qurylysy bastalsa da ony jańa oqý jylyna deiin aiaqtaý qiyn ekenin aitty.
«Kóterip otyrǵan másele ózekti. Ol jerde 60 oryndy mektep salý jospary bar. Qazir jobalyq qujattamaǵa qaitadan túzetý engizilip jatyr. Eń kóp degende úsh ai ýaqyt alady. Qujat qolǵa tigende oblystyq biýdjetten qarjy bólemiz. Qurylysty jyldyń aiaǵynda bastaityn bolamyz. Biylǵy oqy jylynda aýdandyq bilim bólimi alyp bergen oqý ǵimaratynda bilimin jalǵastyrady», - dedi oblys ákiminiń orynbasary Bulbul Eleýsinova.
