Foto: aikyn.kz
Aqtóbede áriptesin aldap, atynan 7,7 million teńge nesie rásimdep, keiin qylmysyn jasyrý úshin óltirip tastaǵan er adam 20 jylǵa sottaldy, dep habarlady oblystyq sottyń baspasóz qyzmeti.
Qylmystyq is Aqtóbe oblysynyń qylmystyq ister jónindegi mamandandyrylǵan aýdanaralyq sotynda qaraldy. Is materialdaryna sáikes, sottalýshy L. zaýytta birge isteitin áriptesi K.-men daýlasqannan keiin odan aqsha bopsalaýǵa sheshim qabyldaǵan.
2025 jyldyń sáýir aiynda ol K.-ny úiiniń aldynda tosyp, kóligimen qala syrtyndaǵy aimaqqa aparǵan. Sol jerde jábirlenýshini telefony arqyly 7,7 million teńge nesie rásimdeýge májbúrlep, aqshany tanysy Ý.-dyń esepshotyna aýdarǵan.
Qylmysty jasyrý úshin L. áriptesin shúberekpen qylǵyndyryp óltirip, máiitin Alǵa aýdany aýmaǵyna aparyp kómip tastaǵan. Tergeý barysynda Ý. asa aýyr qylmysty jasyryp qalǵany úshin jaýapqa tartyldy.
Sot úkimimen:
L. QR Qylmystyq kodeksiniń 99-babynyń 2-bóligi (adam óltirý) jáne 194-babynyń 3-bóligi (iri mólsherde qorqytyp alý) boiynsha kináli dep tanylyp, 20 jylǵa bas bostandyǵynan aiyryldy;
Ý. QR QK-niń 432-baby (qylmysty jasyrý) boiynsha kináli dep tanylyp, 3 jyl 2 aiǵa bas bostandyǵynan aiyryldy, biraq Konstitýtsiianyń 30 jyldyǵyna orai raqymshylyq zańymen jazasy jeńildetildi.
Sottalýshylardyń kinási beinebaqylaý jazbalary, saraptama qorytyndylary jáne zattai aiǵaqtarmen dáleldendi.
Jábirlenýshi tarap sottan qatań jaza taǵaiyndaýdy talap etken. Sot úkimi áli zańdy kúshine engen joq.
