Aqtóbe qalasynda dárigerler men memlekettik qyzmetkerler vaktsina qabyldady. Alǵashqy kúni 94 adamǵa ekpe berildi, dep habarlaidy "Ult aqparat".
Ótken táýlikte Aqtóbe oblysynda 3 adamnan koronavirýs infektsiiasy anyqtaldy. Qazirgi kezde qaladaǵy № 2, 3, 4 emhanalarda, Otbasylyq meditsina ortalyǵynda, oblystyq keńes berý-diagnostikalyq ortalyǵynda, «Medikýs» ortalyǵynda «qyzyl» aimaqta júrgen aq halattylar ekpe qabyldap jatyr. Olar: infektsiialyq, karantindik statsionar qyzmetkerleri, epidemiologtar. Keshe oblys ákiminiń birinshi orynbasary Nurjaýǵan Qalaýov ta vaktsina saldyrdy. Bul jumysqa 189 meditsina qyzmetkeri tartylǵan. Birinshi kúni 91 adam egildi.
«Qazirgi kezde ekpe salý Aqtóbe qalasynda júrgizilip jatyr. Aýdandar bul naýqanǵa keiinirek kirisedi. Bizdiń mindetimiz - ekpe salý kezinde barlyq talap pen normalardy qatar saqtap, jaǵdai jasaý»,- dedi óńir basshysy Ońdasyn Orazalin oblys ákimdiginde ótken jiyn kezinde.
Aita keteiik, Aqtóbede tósek-oryn sany 445-ten 3603-ke deiin arttyrýǵa múmkindik bar. Olardyń 57,1% ottegimen qamtylǵan. 21 statsionarlyq rentgen apparaty ornatyldy. 382 ókpeni jasandy jeldetetin apparaty, 450 ottegi kontsentraty, 626 ottegi ballony, 787 Bobrov apparaty men 424 ottegi jastyǵy bar. Jedel járdem beketteri men emdeý mekemeleriniń avtoparki 41 sanitarlyq mashinamen tolyǵyp, 6 mobildi diagnostikalyq keshen satyp alyndy. Dárilik jáne jeke qorǵanys zattarynyń eki ailyq qory jasaldy.
