Foto: unspash
Aqtóbe oblysynyń Yrǵyz aýdanyna qarasty Oiyl aýylynda eldi eseńgiretken oqiǵa tirkeldi. Sabaq ústinde 14 jastaǵy mektep oqýshysynyń tolǵaǵy bastalyp, ol tikelei synyptan perzenthanaǵa jetkizilgen. Bul týraly munar-media.kz habarlaidy.
Mektep ákimshiligi men muǵalimder, tipti jaqyn týystary da osy ýaqytqa deiin qyzdyń júkti ekenin bilmegen. 13 qazan kúni jasóspirim qyz ul balany dúniege ákeldi. Sábidi týystary óz qamqorlyǵyna alǵan. Al qyzdyń jaǵdaiy dárigerlerdiń aitýynsha, qanaǵattanarlyq.
Mektep direktorynyń aitýynsha, ol 9-synypta oqidy, úlgili, sabyrly, qoǵamdyq ómirge belsendi qatysatyn oqýshy bolǵan.
«Mektep formasymen júretin, eshqashan sabaqtan qalmaityn. Muǵalimder kún saiyn kórip júrgen qyz edi. Muǵalimder kúnine arnalǵan kontsertte bi bilep, sahnaǵa shyqqan. Fizkýltýra sabaǵynda da belsendi bolatyn. Keshe sabaq kezinde ishi aýyrǵanyn aityp, jylap qaldy. Aýrýhanaǵa aparǵanda dárigerler 39 aptalyq júkti ekenin aitty, sosyn bosaný bastaldy», — deidi mektep direktory.
Taǵy bir soraqysy – qyrkúiek aiynda qyz tolyq meditsinalyq tekserýden ótken, biraq dárigerler júkti ekenin anyqtai almaǵan.
Qazir oblystyq densaýlyq saqtaý basqarmasy arnaiy komissiia quryp, qyzmettik tergeý bastalǵanyn habarlady.
Politsiia da isti tergeýge kiristi. Kúdikti retinde qyzdyń týǵan emes atasy — iaǵni ájesiniń kúieýi ustalǵan.
«Kúdikti anyqtalyp, qamaýǵa alyndy. Tergeý amaldary júrip jatyr. Ózge málimetter tergeý múddesine bailanysty jariialanbaidy», — dep málim etti oblystyq politsiia departamenti.
Bul oqiǵa elimizde jasóspirimderge qatysty zorlyq-zombylyqtyń qanshalyqty tereń ári jasyryn sipatqa ie ekenin taǵy da kórsetti.
Qoǵam mundai qylmystarǵa beijai qarasa, eń qorǵansyzdardyń — balalardyń taǵdyry osylai aiaqtala bermek.
