Foto: ashyq derekkóz
Aqtóbe qalasynyń №2 soty 136 adamdy aldap, 579 mln teńgeden astam qarjyny iemdengen emshi Sulýshash Qazbaevaǵa úkim shyǵardy. Ol alaiaqtyq jasaǵany úshin kináli dep tanylyp, 6 jyl 8 aiǵa bas bostandyǵynan aiyryldy, dep habarlaidy Ult.kz.
Tergeý málimetinshe, Qazbaeva azamattardy meshit salý, balasyn shetelde emdetý jáne emshilik qyzmetin keńeitý syndy syltaýlarmen bankterden nesie alýǵa kóndirip, aqshany óz paidasyna jaratqan. Al alynǵan qarajatty qaitarýǵa nietti bolmaǵan.
Jábirlenýshilerge keltirilgen jalpy shyǵyn — 579 million teńge.
Sotta Qazbaeva óz kinásin moiyndamady. Prokýror onyń áreketin alaiaqtyq dep baǵalap, jábirlenýshilerdiń azamattyq talaptaryn qanaǵattandyrýdy suraǵan. Sot bul talaptardy ishinara oryndady.
Sottalǵan áiel jazasyn eki jyldan keiin óteýdi bastaidy — sol kezde onyń balasy 14 jasqa tolady. Úkim zańdy kúshine áli engen joq.
