Foto: nensuria/ru.freepik.com
Aqtóbede 10 jasar qyz alaiaqtardyń qurbany boldy, – dep habarlaidy Polisia.kz.
Belgisiz áiel úi telefonyna qońyraý shalyp, 10 jasar qyzǵa onyń anasy jol-kólik oqiǵasyn jasap, jaiaý júrginshini qaǵyp ketkenin, jaýapkershilikten qutqarý úshin kóp aqsha qajet ekenin aitqan. Ózin tergeýshi retinde tanystyrǵan áiel tipti telefondy qyzdyń anasyna bergendei keiip tanytqan. “Anasy” jylaǵan daýyspen baladan úidegi bar aqshany berip jiberýdi ótingen.
Budan ári alaiaq 10 jasar qyzǵa 700 myń teńge kólemindegi aqsha salynǵan paketti óziniń sybailasyna qalai berý kerektigin aitqan. Anasynyń qiyndyqqa tap bolǵanyna senip, shoshyp qalǵan bala aqshany olar aitqan nusqaý boiynsha berip jibergen. Anasy úige kelgennen keiin ǵana balanyń alaiaqtarǵa aldanǵany belgili bolǵan.
"Politsiia qyzmetkerleri jedel-izdestirý is-sharalary barysynda 23 jastaǵy kúdiktini ustady. Ol óziniń kinásin moiyndap, áleýmettik jeli arqyly belgisiz adammen kezdeskenin aitty. Ol oǵan jumys usynǵan. Mindet – jábirlenýshiden aqsha alý jáne barlyq somany kórsetilgen “jumys berýshiniń” shotyna aýdarý bolǵan.
Osy fakti boiynsha QR QK-niń 190-baby 1-bóligi (Alaiaqtyq) boiynsha sotqa deiingi tergeý bastaldy" - delingen habarlamada.
Óńirde alaiaqtyqtyń qurbany bolyp, politsiiaǵa júgingender sany artyp barady. Alaiaqtar jábirlenýshilerge týystary apatqa ushyraǵanyn aityp qońyraý shalyp, zardap shegýshilerdi emdeý nemese qylmystyq isti toqtatý úshin qajet degen syltaýmen aqsha talap etedi. Politsiia qyzmetkerleri mundai qońyraýlarǵa senbes buryn, anyq-qanyǵyna kóz jetkizý kerek ekenin eske salady.
