Aqtóbe oblysynyń ákimi Ońdasyn Orazalin shoshqa fermasyndaǵy jaǵdaiǵa qatysty óz oiyn bildirdi, dep habarlaidy "Ult aqparat".
«Bestamaqta bolǵan jaǵdaiǵa bailanysty barlyq quzyrly mekemege tiisti tapsyrma berdim. Qazir osyǵan qatysty arnaiy komissiia quryldy. Olar jaǵdaidy jiti tekseretin bolady. Sondai-aq, osy salaǵa jaýapty orynbasarym men ekolog mamandar brifing berdi. Komissiia tekseristi aiaqtaǵan soń, barlyǵyn ashyq baiandaityn bolady. Arandatýshylyqqa jol bermeimiz. Bizdiń basty jetistigimiz – bereke men birlik, tynyshtyq. Aýyzbirshilik tanytaiyq, ábden istiń baiybyna baryp, sabyr saqtap, quzyrly organdardyń tekserý nátijesin kúteiik», - dep jazdy oblys ákimi Ońdasyn Orazalin.
Eske salsaq, Aqtóbe oblysy Alǵa aýdanynyń turǵyndary shoshqa fermasyndaǵy biraz kemshilikti atady. Olar ishek-qaryndy joiý, ólekseni zalalsyzdandyrý jumysy júrgizilmeitinin, kómý kezinde biraz talaptyń saqtalmaitynyn aitty. Qazir munda shoshqa soiý jumysy toqtap tur. Ekologtar da kemshiliktiń tirkelgenin rastady.
