Búgin Ortalyq kommýnikatsiialar qyzmetinde ótken baspasóz máslihatynda Aqtóbe oblysynyń ákimi Ońdasyn Orazalin óńir ortalyǵynda qýrap qalǵan 1 mln túp aǵashqa qatysty pikir bildirdi, dep habarlaidy QazAqparat.
«Aǵash egý, menińshe jaqsy úrdis, túzý niet. Biraq ony iske asyrýda kemshilikter bolýy múmkin. Bizdiń aldymyzda istegen áriptesterim jaqsy nietpen Aqtóbege birneshe myń aǵash ekse, ony tolyq qoldaý kerek. Alaida, Aqtóbeniń bir problemasy – sýarý. Aǵash egýmen qatar sýarýdy da tolyq qamtamasyz etý qajet. Qazir sonymen ainalysyp jatyrmyz. Tiisti sharalardy qoldanýdy josparlap otyrmyz», - dedi óńir basshysy.
Osy oraida BAQ ókilderi Aqtóbe qalasynyń jasyl jelegin túgendeý jumysyna reseilik mamandardyń tartylýy sebebin suraǵan edi.
«Birinshiden – zańǵa, ekinshiden – mamandardyń pikirine súienýimiz qajet. Al endi olardyń Reseiden ne Qazaqstannan bolatyndyǵyn qala ákimdigi sheship otyr. Biz birneshe pikirdi tyńdaýymyz kerek. Kórshilerimiz bul rette úlken jetistikke jetse, tájiribesin alýdyń esh aiyby joq. Ekken aǵashtardyń qýrap qalǵany ókinishti jaǵdai. Sol qalada dúniege kelgennen soń, meniń de janym ashidy. Qolymnan kelgenshe osy máseleni sheshýge, atsalysýǵa daiynmyn», - dedi O.Orazalin.
Eske salsaq, Aqtóbe óńirinde 2017 jyly otyrǵyzylǵan 1 million túp kóshet sýarylmai, qýrap qalǵan bolatyn. Bul úshin biýdjettiń 70 million teńgeden astam qarjysy jumsaldy.
