Áleýmettik jelide prezident pen quzyrly organdardan kómek suraǵan jas qyzdyń videosy tarady. Ol ózin burynǵy ýchaskelik politsei zorlaǵanyn málimdep, ornyna kinásiz adamnyń 10 jylǵa sottalyp ketkenin málimdedi, dep habarlaidy Sputnik Qazaqstan.
Qumash arnasynda jariialanǵan videoda 16 jastaǵy qyz úsh jyl buryn júkti bolyp, zańsyz túsik jasatýǵa májbúr bolǵanyn aitady. Onyń sózine qaraǵanda, jergilikti ýchaskelik politsei zorlaǵan. Sosyn kinásiz adamǵa qarsy jalǵan málimet berýge mindettedi. Osylaisha, esh kinási joq adamdy túrmege qamap tastady.
"2019 jyly maǵan adamdy aiaqtan shalýǵa ótinish jasaldy. Qazir ol kisi túrmede otyr. Oǵan jamandyq jasaýǵa Aqtóbe oblysy Qarǵaly aýdanyndaǵy Petropavlovka aýylynyń burynǵy ýchaskelik politseii májbúrledi. Sebebi ol maǵan bilik júrgizdi, menimen jynystyq qarym-qatynasta boldy. Sol kezde 13 jasta boldym. Qarym-qatynas zorlyqpen qyzmettik kólikte jasaldy. Ózara kelisim bolǵan joq", - deidi ol.
Búginde qyzdyń anasy bala asyraý quqyǵynan aiyrylǵan. Úsh jyl buryn qatty ishken. Ákesi joq. Turmysy tómen otbasy bolǵannan keiin ýchaskelik politsei jii kelip turǵan. Al qyz júkti bolǵan soń anasynyń araq ishkenin paidalanyp, túsik jasatýǵa aryz jazdyrtyp aldy.
"Túsikti zańsyz jasady. Odan keiin anamdy birden bala asyraý quqyǵynan aiyrdy. Ýchaskelik politsei barlyq kináni basqa adamǵa jabýǵa mindettedi. Meni zorlady, odan bala taptym dep aitýdy buiyrdy. Maǵan qysym jasady, qorqytty. Sol sebepti qarsy shyǵa almadym. Kýágerlerdi de kóndirdi. Kinásiz adamdy 10 jylǵa otyrǵyzyp tastady", - deidi jas qyz.
Aqtóbe oblystyq politsiia departamenti osy oqiǵa boiynsha túsinikteme berdi. Resmi málimetke sáikes, 2018 jyly atalǵan fakti boiynsha sotqa deiingi tergeý sharalary atqaryldy.
"Kúdiktiniń uryǵyna genomdyq saraptama jáne DNQ-ǵa salystyrmaly taldaý taǵaiyndaldy. Budan basqa, barlyq faktiler - kýágerlerdiń aiǵaqtary jáne júrgizilgen saraptamalar sottalǵan adamnyń osy qylmysqa qatystyǵyn dáleldeidi", - dedi quqyq qorǵaýshylar.
Sot er adamdy kináli dep tanyp, 10 jylǵa bas bostandyǵynan aiyrdy. Ol apelliatsiialyq shaǵym túsirgen. Alaida sot birinshi satydaǵy úkimdi ózgerissiz qaldyrdy.
