Aqtóbe oblysynda koronavirýsqa qarsy 1 myń doza vaktsina jetkizilip, dárigerler ekpe qabyldap jatyr, dep habarlaidy "Ult aqparat".
Keshe elimizge «Spýtnik V» vaktsinasy jetkizildi. Ile-shala óńirler suranysy boiynsha ár aimaq ózine tiesili vaktsina dozasyn qabyldap aldy. Aqtóbege 1 myń danasy ákelindi.
Oblystyq Densaýlyq saqtaý basqarmasynyń basshysy Rústem Isaev qaýipsizdik úshin áýejaiǵa baryp, «Spýtnik V» ekpesin jetkizý, túsirý, tieý jumystaryn baqylady. Odan ári vaktsina qoimaǵa jetkizildi. Talap boiynsha bári tońazytqyshqa ornalastyryldy. Sol jerden oblystyq balalar aýrýhanasynda tasymaldanyp, qalanyń 8 emhanasyna bólindi.
«Qazir bizde «qyzyl» aimaqta 960 meditsina qyzmetkeri jumys isteidi. Birinshi sol qyzmetkerler qabyldaidy. Ózim de qabyldadym. Jaǵdaiym jaqsy», - dedi oblystyq Densaýlyq saqtaý basqarmasynyń basshysy Rústem Isaev.
Sonymen birge kishi meditsina qyzmetkerleri de alǵashqy bolyp vaktsinalandy.
«Tańerteń saǵat 10:23-te vaktsina qabyldadym. Keiin 30 minýt tynyqtym. Bári jaqsy. Qandai da bir keri áserin baiqamadym. Aldymen meditsina qyzmetkeri alýy tiis degen oidy quptaimyn. Ózgeler bizdiń jolymyzben júredi dep esepteimin. Otbasyma da vaktsina saldyrýǵa keńes beremin. Qazir ózimdi qaýipsiz sezinemin», - dedi meditsina mamany Jomart Makarov.
Aita keteiik, jalpy oblys boiynsha 150 myń adam vaktsina qabyldaidy. Búgin ekpe jasatqan meditsina qyzmetkerleri 21 kúnnen soń ekinshi dozany alady.
«Emhanada vaktsina qabyldaǵan alǵashqy bes adamnyń biri ózim boldym. Bul kádimgi ekpe. Esh áserin ázirge sezbedim. Koronavirýs infektsiiasyn jeńýdiń bir joly vaktsina dep esepteimin. Búgin qabyldadym, 21 kúnnen soń ekinshi vaktsinasyn egemin», - №3 Aqtóbe qalalyq emhanasynyń bólim meńgerýshisi Lázzat Bisenova.
