Aqtóbe oblysynyń kámeletke tolmaǵandar isteri jónindegi mamandandyrylǵan aýdanaralyq soty kámeletke tolmaǵan qyzdyń anasy men onymen birge turǵan adamǵa qatysty úkim shyǵardy, - dep habarlaidy Tengrinews.kz agenttigi diapazon.kz saityna silteme jasap.
Qyzdyń anasy 9 jylǵa bas bostandyǵynan aiyryldy.
"Sot úkimimen kámeletke tolmaǵan qyzdyń anasy 9 jylǵa bas bostandyǵynan aiyryldy, al birge turǵan M. 7 jylǵa bas bostandyǵynan aiyryldy. Sottalýshylardyń ekeýi de pedagogikalyq laýazymdardy jáne kámeletke tolmaǵandarmen jumys isteýge bailanysty qyzmetterdi atqarý quqyǵynan aiyryldy", - delingen habarlamada.
Aqtóbe oblysynyń kámeletke tolmaǵandar isteri jónindegi mamandandyrylǵan aýdanaralyq soty QR Qylmystyq kodeksiniń 124-baby 2-bóligi (Kámeletke tolmaǵandardy azǵyndaý) boiynsha J.-ǵa jáne sol baptyń 1-bóligi boiynsha onyń seriktesine qatysty isti qarady.
"Sot 2020 jyly 30 qazanda saǵat 12:00-den 18:00-ge deiin M. esimdi kúdikti J.-nyń 2012 jyly týǵan qyzyna zorlyq-zombylyq kórsetpei, azǵyndyq áreketter jasaǵanyn anyqtady. J. men M.-nyń kinási jábirlenýshiniń, zańdy ókildiń, kýágerlerdiń aiǵaqtarymen, saraptama qorytyndylarymen, oqiǵa bolǵan jerdi tekserý hattamasymen, tergeý eksperimentimen dáleldendi", - delingen habarlamada.
Qylmystyq jaýapkershilik pen jazany jeńildetetin jaǵdailar anyqtalmady. Úkim zańdy kúshine engen joq.
