Aqtóbe oblysynda 3 halyqaralyq ótkizý beketi ashylady. Bul týraly búgin Ortalyq kommýnikatsiialar qyzmetindegi baspasóz máslihatynda Aqtóbe oblysynyń ákimi Ońdasyn Orazalin aitty, dep habarlaidy QazAqparat.
«Oblystaǵy ózekti máselelerdiń biri - jol. Sondyqtan biyl osy máseleni sheshý, jergilikti joldardy damytý úshin bólinetin qarajat 1,3 ese ósti. Qazirgi tańda 43,6 mlrd teńge bólindi. Bul 500 shaqyrymnan astam jergilikti joldy jóndeýge múmkindik beredi. Kelesi jyly «Aqtóbe-Qandyaǵash», «Aqtóbe-Orsk» joldaryn jóndeý josparlanyp otyr. Onyń ústine Aqtóbe qalasynyń batys ainalma joly tolyq aiaqtalady, kópir paidalanýǵa berilip, syrttan keletin kólikterdiń qalaǵa kirmei syrt ainalyp ketýine tolyq múmkinshilik bolady», - dedi óńir basshysy.
Sonymen qatar oblys ákimi «Aqtóbe-Hromtaý-Qarabutaq-Ulǵaisyn», «Ortalyq-Batys» joldaryn salýǵa Úkimet qoldaý bildirip otyrǵanyn aitty.
«Bul - ózekti máselelerdiń biri. Sebebi Aqtóbeniń erekshe kóliktik-logistikalyq áleýeti bar. Elbasy bastamasymen «Batys Eýropa - Batys Qytai» dálizi tolyq iske qosyldy. Onyń ústine ońtústik kórshimizdiń (Ózbekstan) qarqyndy damyp, osy joldardy paidalanýynyń arqasynda Aqtóbe oblysynyń ekonomikalyq áleýeti kólik-logistika salasynda erekshe ósti. Sebebi Aqtóbe - Qazaqstan boiynsha ońtústik jaǵynan da, soltústik jaǵynan da shekarasy bar jalǵyz oblys. Batys Qytaidan bolsyn, Ortalyq Aziiadan bolsyn júk Aqtóbe oblysynyń aýmaǵynan ótedi. Oblys aýmaǵy arqyly júk tasymalynyń artqany qýantady. Degenmen, jol infraqurylymyn damytýǵa erekshe nazar aýdarýdy talap etedi. Osyǵan bailanysty Úkimet tarapynan tolyq qoldaý bar», - dedi O.Orazalin.
Munan bólek ol tranzittik áleýetti damytý aiasynda oblysta úsh halyqaralyq ótkizý beketin ashý máselesi pysyqtalyp jatqanyn aitty.
«Reseimen shekarada jumys istep turǵan «Áiteke bi - RF Soiýznye» jáne «Jirenqopa - Birinshi mamyr» beketteriniń mártebesin, Ózbekstanmen shekaradaǵy Bozoi aýyly jaǵyndaǵy beketti halyqaralyq deńgeige kóterýdi josparlap otyrmyz», - dedi oblys ákimi.
