Foto: ashyq derekkóz
Aqtóbedegi meshitte bolǵan daýly jaǵdaidan keiin tanymal ánshi Miras Júginisov óziniń Instagram paraqshasynda málimdeme jasap, aǵasy Rústem Júginisovtiń sózine bailanysty pikir bildirdi, dep habarlaidy Ult.kz.
Ol aǵasynyń aitqandary qoǵamda rezonans týǵyzyp, keibir azamattardyń renishin týdyrǵanyn moiyndady.
"Sońǵy kúnderi aǵamnyń aitqan pikiri qoǵamda úlken rezonans týdyryp, keibir jandardyń kóńiline tiip jatyr. Ol óz oiyn bildirgen jeke tulǵa. Men óz jolym, óz ustanymym bar adammyn. Men otbasymnyń ár múshesin qurmetteimin, biraq olardyń jeke kózqarastary meniń oiymmen árdaiym sáikes kele bermeidi. Sol úshin de keibir kezde máseleler týyndaidy. Olardy osylai aityp otyramyn dep oilamadym. Ne aitqym kelgenin sizder túsinip otyrsyzdar", – dep jazdy Miras.
Miras Júginisov óziniń shyǵarmashylyǵynda árdaiym qyz balasyna, jalpy adamǵa qurmet ideiasyn dáripteitinin atap ótti.
"Meniń shyǵarmashylyǵym adamǵa qurmet jaily. Názik jandylarǵa arnalǵan ánderim de bar. Óitkeni áiel adamnyń orny meniń ómirimde erekshe. Bul jaǵdaidan kóńili qalǵan barsha jannan keshirim suraimyn. Sizderdiń senimderińiz men úshin óte mańyzdy", – dedi ánshi.
Rústem Júginisov ne dedi?
Aita keteiik, burynyraqta ánshilik ónerimen tanylǵan Rústem Júginisov Aqtóbedegi meshitte bolǵan daýly jaǵdaiǵa qatysty óz pikirin bildirgen bolatyn.
"Bir rettik nemese eki kúndik neke degen dinde joq. Bul – ótirik nárse. Adamdardy shatastyrmaý kerek", – dedi ol.
Osydan keiin ol qyzdar da er jigitterdiń "sóz aitýyna" yqpal etetinin de tuspaldap jetkizdi.
"Áieldiń meshiti – onyń úii. Er adamdar meshitte namaz oqyǵany durys bolsa, áielderge úide oqyǵany abzal. Ózderińizden de bar. Eger meshitte solai júrseńizder, er adamdar jaman oiǵa ketedi. Sondyqtan abai bolyńyzdar. Namazdy keshke úide oqyǵan durys", – dedi.
Rústem Júginisovtyń bul málimdemesi qoǵam arasynda daý týǵyzyp, keibir qoldanýshylar Júginisovter otbasyn sahnaǵa shyǵarmaý kerek degen bastama kóterdi.
Al qyzǵa bir rettik neke usynǵan er adam QR Ákimshilik quqyqbuzýshylyq týraly kodeksiniń 449-baby 2-bóligi — «Qoǵamdyq orynda tiisý» boiynsha bes táýlikke qamaldy.
