Qazaqstandyq kópbalaly analar memlekettik járdemaqydan óz erkimen bas tartý týraly sheshim qabyldaǵanyn málimdedi. Olar mundai qadamǵa otbasylarynyń qazirgi materialdyq jaǵdaiy memlekettik kómeksiz kún kórýge múmkindik beretinin aityp, áleýmettik qoldaýǵa muqtaj jandarǵa kóbirek múmkindik bergisi keletinin túsindirgen, dep habarlaidy ult.kz.
Bul týraly Ermekova Ásemgúl men Ahmetqanova Zaǵipanyń Instagram jelisindegi jazbalarynda aitylǵan.
Ásemgúl kópbalaly otbasy retinde respýblikalyq biýdjetten járdemaqy alyp kelgenin jazǵan. Alaida áleýmettik qoldaý júiesinde otbasynyń naqty ál-aýqatyn eskeretin ataýly tásil engizilip jatqandyqtan, tólemnen óz erkimen bas tartýdy uiǵarǵan.
Onyń pikirinshe, memlekettik kómek birinshi kezekte oǵan shyn máninde muqtaj otbasylarǵa berilýi kerek.
«Men úshin bul shyǵyn emes, adal jáne ádil áreket etý múmkindigi», – dep jazǵan ol.
Al Zaǵipa Ahmetqanova da kópbalaly ana retinde alatyn járdemaqysynan bas tartýǵa sheshim qabyldaǵanyn aitqan. Onyń sózinshe, keibir otbasylar úshin bul qarajattyń mańyzy zor. Ásirese, ata-anasy ýaqytsha jumyssyz qalǵan, kishkentai balalary bar nemese em-domǵa, tamaq pen kiimge kóp qarajat jumsaityn otbasylarǵa memlekettik kómek asa qajet.
Sonymen birge ol járdemaqy alatyn otbasylardy aiyptamaitynyn atap ótken. Eger otbasy qarjylai qoldaýǵa muqtaj bolsa, zańda kózdelgen kómekti alýǵa quqyly ekenin jetkizgen.
«Eger meniń otbasym qazir óz jaǵdaiyn ózi qamtamasyz ete alsa, bul kómekten bas tartýdy jón kóremin», – dep jazǵan Zaǵipa Ahmetqanova.
Eki áiel de bul sheshimdi óz erkimen qabyldaǵanyn aityp, memlekettik qoldaýdy shyn muqtaj jandarǵa baǵyttaýdy áleýmettik jaýapkershilik dep sanaitynyn jetkizgen.
Aita keteiik, Eńbek jáne halyqty áleýmettik qorǵaý ministrligi ár otbasynyń tsifrlyq beiinin qalyptastyryp, áleýmettik ál-aýqat deńgeiin anyqtaityn otbasynyń tsifrlyq kartasyn ázirledi.
