قازاقستاندىق كٶپبالالى انالار مەملەكەتتٸك جەردەماقىدان ٶز ەركٸمەن باس تارتۋ تۋرالى شەشٸم قابىلداعانىن مەلٸمدەدٸ. ولار مۇنداي قادامعا وتباسىلارىنىڭ قازٸرگٸ ماتەريالدىق جاعدايى مەملەكەتتٸك كٶمەكسٸز كٷن كٶرۋگە مٷمكٸندٸك بەرەتٸنٸن ايتىپ, ەلەۋمەتتٸك قولداۋعا مۇقتاج جاندارعا كٶبٸرەك مٷمكٸندٸك بەرگٸسٸ كەلەتٸنٸن تٷسٸندٸرگەن, دەپ حابارلايدى ult.kz.
بۇل تۋرالى ەرمەكوۆا ەسەمگٷل مەن احمەتقانوۆا زاعيپانىڭ Instagram جەلٸسٸندەگٸ جازبالارىندا ايتىلعان.
ەسەمگٷل كٶپبالالى وتباسى رەتٸندە رەسپۋبليكالىق بيۋدجەتتەن جەردەماقى الىپ كەلگەنٸن جازعان. الايدا ەلەۋمەتتٸك قولداۋ جٷيەسٸندە وتباسىنىڭ ناقتى ەل-اۋقاتىن ەسكەرەتٸن اتاۋلى تەسٸل ەنگٸزٸلٸپ جاتقاندىقتان, تٶلەمنەن ٶز ەركٸمەن باس تارتۋدى ۇيعارعان.
ونىڭ پٸكٸرٸنشە, مەملەكەتتٸك كٶمەك بٸرٸنشٸ كەزەكتە وعان شىن مەنٸندە مۇقتاج وتباسىلارعا بەرٸلۋٸ كەرەك.
«مەن ٷشٸن بۇل شىعىن ەمەس, ادال جەنە ەدٸل ەرەكەت ەتۋ مٷمكٸندٸگٸ», – دەپ جازعان ول.
ال زاعيپا احمەتقانوۆا دا كٶپبالالى انا رەتٸندە الاتىن جەردەماقىسىنان باس تارتۋعا شەشٸم قابىلداعانىن ايتقان. ونىڭ سٶزٸنشە, كەيبٸر وتباسىلار ٷشٸن بۇل قاراجاتتىڭ ماڭىزى زور. ەسٸرەسە, اتا-اناسى ۋاقىتشا جۇمىسسىز قالعان, كٸشكەنتاي بالالارى بار نەمەسە ەم-دومعا, تاماق پەن كيٸمگە كٶپ قاراجات جۇمسايتىن وتباسىلارعا مەملەكەتتٸك كٶمەك اسا قاجەت.
سونىمەن بٸرگە ول جەردەماقى الاتىن وتباسىلاردى ايىپتامايتىنىن اتاپ ٶتكەن. ەگەر وتباسى قارجىلاي قولداۋعا مۇقتاج بولسا, زاڭدا كٶزدەلگەن كٶمەكتٸ الۋعا قۇقىلى ەكەنٸن جەتكٸزگەن.
«ەگەر مەنٸڭ وتباسىم قازٸر ٶز جاعدايىن ٶزٸ قامتاماسىز ەتە السا, بۇل كٶمەكتەن باس تارتۋدى جٶن كٶرەمٸن», – دەپ جازعان زاعيپا احمەتقانوۆا.
ەكٸ ەيەل دە بۇل شەشٸمدٸ ٶز ەركٸمەن قابىلداعانىن ايتىپ, مەملەكەتتٸك قولداۋدى شىن مۇقتاج جاندارعا باعىتتاۋدى ەلەۋمەتتٸك جاۋاپكەرشٸلٸك دەپ سانايتىنىن جەتكٸزگەن.
ايتا كەتەيٸك, ەڭبەك جەنە حالىقتى ەلەۋمەتتٸك قورعاۋ مينيسترلٸگٸ ەر وتباسىنىڭ تسيفرلىق بەيٸنٸن قالىپتاستىرىپ, ەلەۋمەتتٸك ەل-اۋقات دەڭگەيٸن انىقتايتىن وتباسىنىڭ تسيفرلىق كارتاسىن ەزٸرلەدٸ.
