Aqtóbe qalasy Almaty aýdanynyń burynǵy ákimi Abat Kóbenov alaiaqtyq isi boiynsha aiyptalyp, sot oǵan 3 jylǵa bas bostandyǵynan aiyrý jazasyn taǵaiyndady, dep habarlaidy QazAqparat.
Aqtóbe qalasynyń №2 sotynda Abat Kóbenovke qatysty qylmystyq is qaraldy. Oǵan Qylmystyq kodekstiń «Alaiaqtyq» baby boiynsha aiyp taǵyldy. Is materialyna súiensek, Kóbenov Aqtóbe qalasy ákimi apparatynyń basshysy bolǵan kezde óziniń qyzmet babyn paidalanyp, 2020 jyldyń sáýir-tamyz ailarynda burynǵy tanysyna jer telimin alyp berýdi ýáde etken. Sóitip, tanysynan 1 383 915 teńge aqsha alǵan. Sot otyrysynda sottalýshy kinásin tolyq moiyndady. Sonymen qatar, taǵylǵan aiyp jábirlenýshiniń jaýaby, «Kaspi Gold» bank kartasyndaǵy aqsha aýdarymdary arqyly rastaldy.
«Prokýror laýazymdy memlekettik qyzmetti atqarý quqyǵynan ómir boiyna aiyra otyryp, 3 jyl 6 ai merzimge bas bostandyǵynan aiyrý jazasyn taǵaiyndaýdy surady. Sottalýshynyń shynaiy ókingeni, balalary jáne de qylmystyq quqyq buzýshylyqty ashýǵa belsendi túrde yqpal etkeni jazasyn jeńildetetin mán-jailary retinde tanyldy. Sot sheshimimen A. Kóbenov kináli dep tanylyp, oǵan memlekettik qyzmette laýazymdardy atqarý quqyǵynan ómir boiyna aiyra otyryp, 3 jyl merzimge bas bostandyǵynan aiyrý jazasy taǵaiyndaldy», - dedi Aqtóbe qalasy №2 sotynyń baspasóz qyzmeti.
Sottyń úkimi zańdy kúshine engen joq.
Aita ketsek, Abat Kóbenov 2020 jyldyń sáýir aiynan bastap Aqtóbe qalasy ákimi apparatynyń basshysy qyzmetin atqardy. Al, biyl aqpan aiynda Aqtóbe qalasy Almaty aýdanynyń ákimi bolyp taǵaiyndalǵan edi.
