اقتٶبە قالاسى الماتى اۋدانىنىڭ بۇرىنعى ەكٸمٸ ابات كٶبەنوۆ الاياقتىق ٸسٸ بويىنشا ايىپتالىپ, سوت وعان 3 جىلعا باس بوستاندىعىنان ايىرۋ جازاسىن تاعايىندادى, دەپ حابارلايدى قازاقپارات.
اقتٶبە قالاسىنىڭ №2 سوتىندا ابات كٶبەنوۆكە قاتىستى قىلمىستىق ٸس قارالدى. وعان قىلمىستىق كودەكستٸڭ «الاياقتىق» بابى بويىنشا ايىپ تاعىلدى. ٸس ماتەريالىنا سٷيەنسەك, كٶبەنوۆ اقتٶبە قالاسى ەكٸمٸ اپپاراتىنىڭ باسشىسى بولعان كەزدە ٶزٸنٸڭ قىزمەت بابىن پايدالانىپ, 2020 جىلدىڭ سەۋٸر-تامىز ايلارىندا بۇرىنعى تانىسىنا جەر تەلٸمٸن الىپ بەرۋدٸ ۋەدە ەتكەن. سٶيتٸپ, تانىسىنان 1 383 915 تەڭگە اقشا العان. سوت وتىرىسىندا سوتتالۋشى كٸنەسٸن تولىق مويىندادى. سونىمەن قاتار, تاعىلعان ايىپ جەبٸرلەنۋشٸنٸڭ جاۋابى, «Kaspi Gold» بانك كارتاسىنداعى اقشا اۋدارىمدارى ارقىلى راستالدى.
«پروكۋرور لاۋازىمدى مەملەكەتتٸك قىزمەتتٸ اتقارۋ قۇقىعىنان ٶمٸر بويىنا ايىرا وتىرىپ, 3 جىل 6 اي مەرزٸمگە باس بوستاندىعىنان ايىرۋ جازاسىن تاعايىنداۋدى سۇرادى. سوتتالۋشىنىڭ شىنايى ٶكٸنگەنٸ, بالالارى جەنە دە قىلمىستىق قۇقىق بۇزۋشىلىقتى اشۋعا بەلسەندٸ تٷردە ىقپال ەتكەنٸ جازاسىن جەڭٸلدەتەتٸن مەن-جايلارى رەتٸندە تانىلدى. سوت شەشٸمٸمەن ا. كٶبەنوۆ كٸنەلٸ دەپ تانىلىپ, وعان مەملەكەتتٸك قىزمەتتە لاۋازىمداردى اتقارۋ قۇقىعىنان ٶمٸر بويىنا ايىرا وتىرىپ, 3 جىل مەرزٸمگە باس بوستاندىعىنان ايىرۋ جازاسى تاعايىندالدى», - دەدٸ اقتٶبە قالاسى №2 سوتىنىڭ باسپاسٶز قىزمەتٸ.
سوتتىڭ ٷكٸمٸ زاڭدى كٷشٸنە ەنگەن جوق.
ايتا كەتسەك, ابات كٶبەنوۆ 2020 جىلدىڭ سەۋٸر ايىنان باستاپ اقتٶبە قالاسى ەكٸمٸ اپپاراتىنىڭ باسشىسى قىزمەتٸن اتقاردى. ال, بيىل اقپان ايىندا اقتٶبە قالاسى الماتى اۋدانىنىڭ ەكٸمٸ بولىپ تاعايىندالعان ەدٸ.
